Айни замон вазъ дар марзи давлатии Қирғизистону Тоҷикистон орому амн буда, таҳти назорат қарор дорад.
Сардори маркази матбуоти Сарраёсати нерӯҳои марзбонии КДАМ ҶТ подполковник Хушнуд Раҳматуллоев ба ОИ «Азия-Плюс» дар ин робита иттилоъ дод, ки ҷониби Қирғизистон ба ду чоҳи нафтӣ даъво дорад, ки феълан кори онҳо қатъ шудааст. «Марзро гурӯҳи пурзӯршудаи марзбонони тоҷик посбонӣ мекунанд», – иброз дошт ӯ.
Дар идома ӯ зикр кард, ки дар маркази маъмурии вилояти Суғд имрӯз комиссияи байниҳукуматии Тоҷикистону Қирғизистон оид ба аломатгузорӣ дар марзи давлатии кишварҳо ба ҳаллу фасли ин масъала мепардозад.
Қобили зикр аст, ки то ҳол ҳудуди нисфи марзи давлатии Тоҷикистону Қирғизистон аломатгузорӣ нашудааст.
Қаблан сафири Тоҷикистон дар Қирғизистон Олим Раҳимов ба Вазорати корҳои хориҷии Қирғизистон даъват шуда, ба ӯ иттилоъ дода шуд, ки рӯзи 24-уми октябр як гурӯҳи беш аз 100-нафараи хизматчиёни ҳарбии Тоҷикистон ғайриқонунӣ ба қаламрави Қирғизистон то масофаи 500 метр ворид шуда, ин амал мухолифи меъёрҳои байнулмилалӣ ва қарордоди байниҳукуматии Тоҷикистону Қирғизистон дар бораи қатъи фаъолияти чоҳи нафтӣ то муайян шудани мансубияти он мебошад.
Ба сафири Тоҷикистон бо талаби таъҷилан аз қаламрави Қирғизистон хориҷ шудани марзбонони тоҷик ва даъват ба ҳаллу фасли мусолиматомези вазъи мавҷуда нотаи эътирозии ВКХ Қирғизистон супурда шуд.
