Ба маросими савгандёдкунии президенти Тоҷикистон, ки рӯзи 16-уми ноябр доир мегардад, меҳмонони воломақоми хориҷӣ даъват нашуданд.
Як манбаъ аз ҳукумати ҷумҳурӣ ба ОИ «Азия-Плюс» дар ин робита иттилоъ дод, ки ҷаласаи 6-уми иҷлосияи муштараки ҳарду палатаи парлумон соати 09:00-и рӯзи 16-уми ноябр дар бинои Маҷлиси Олии ҷумҳурӣ даъват шудааст, ки дар он Эмомалӣ Раҳмон ба сифати президенти тозаинтихоб савганд ёд мекунад.
«Пас аз ифтитоҳи иҷлосия азъои парлумон ба Кохи Сомон раҳсипор гардида, дар қаламрави он соати 11 маросими сари мансаб омадани президент доир мегардад», – гуфт сарчашмаи хабар.
Ба гуфтаи манбаъ, ба маросим ба ҷуз аъзои парлумон, ҳамчунин роҳбарони вазорату идораҳо, намояндагони аҳли ҷомеа ва корпуси дипломатии муқими Душанбе низ даъват шудаанд. «Дар тамоми шабакаҳои давлатии телевизион пахши мустақими маросими сари мансаб омадани президенти тозаинитихоб роҳандозӣ мешавад», – зикр кард манбаъ.
Дар идома зикр гардид, ки баъди ба Эмомалӣ Раҳмон супурдани ливо, нишон, ордени «Ситораи президенти Тоҷикистон» дараҷаи аввал ва шаҳодатномаи президент, ӯ ба садоқат ба мардум ва Конститусияи кишвар савганд ёд мекунад. «Сипас назди ҳозирин Эмомалӣ Раҳмон бо маърӯзаи барномавӣ суханронӣ намуда, самтҳои асосии рушди Тоҷикистонро мушаххас мекунад», – таъкид дошт манбаъ.
Ҳамчунин зикр гардид, ки пас аз итмоми маросими сари мансаб омадани президенти тозаинтихоби Тоҷикистон бо ҳузури сарвари давлат дар майдони «Дӯстӣ»-и пойтахт бо иштироки беш аз 7 ҳазор нафар афсарону сарбозони сохторҳои қудратӣ ва мақомоти ҳифзи ҳуқуқи ҷумҳурӣ гузашти низомӣ баргузор мешавад.
