Дар маҷмааи давлатии «Кохи Ҷомӣ»-и пойтахт рӯзи панҷшанбеи ҳамин ҳафта Анҷумани VI-уми навбатии Палатаи савдо ва саноати Ҷумҳурии Тоҷикистон (ПСС ҶТ) баргузор шуд.
Бино ба маълумоти хадамоти матбуоти Палата, дар кори Анҷуман кормандони Дастгоҳи иҷроияи президенти мамлакат, мақомоти давлатӣ, намояндагони созмонҳои байнулмилалӣ – шарикони ПСС ҶТ, ташкилотҳои ҷамъиятӣ, 420 нафар вакилони корхонаву созмонҳои тиҷоратӣ, иттиҳодия, бонкҳо ва дигар иттиҳоди соҳибкорон – аъзои Палата ширкат вразиданд.
Дар Анҷуман ҳамчунин президенти Академияи улуми ҶТ Мамадшо Илолов, сафири Туркия дар Тоҷикистон Мехмет Мӯнис Дерик, намояндагони сафоратхонаҳои Чин, Украина ва Белорус дар ҶТ ва ноиби президенти ПСС Қирғизистон Борис Перфилйев низ ҳузур доштанд.
Раиси ПСС ҶТ Шариф Саид ба ҳозирин дар бораи натиҷаҳои фаъолияти Палата давоми солҳои 2008-2013, дастовардҳои назаррас ва вижагиҳои кори ин ниҳод маълумот дод.
Гуфта мешавад, сипас тариқи раъйдиҳии кушод Шариф Саид якдилона аз нав раиси ПСС ҶТ ба муҳлати 5 соли минбаъда интихоб шуд. Асаналӣ Карамалиев ва Лариса Кислякова муовинони раиси ПСС ҶТ интихоб шуданд.
