Раҳбари Наҳзати Исломии Тоҷикистон бо даъвати Маркази Муколамаи Инсонӣ ё Centre for Humanitarian Dialogue ҷиҳати ширкат дар нишасти дурӯзаи ин созмон шоми рӯзи 16-уми декабр ба шаҳри Женеваи Швейтсария сафар намуд.
Бино ба иттилои сомонаи расмии ҲНИТ, дар ин нишаст сиёсатмадорону мутафаккирони исломӣ ва аврупоӣ гирдиҳам омада, атрофи мушкилот ва нофаҳмиҳои ҷаҳонӣ, бахусус миёни Ислом ва Аврупо муколама менамоянд, аз чумла, атрофи мавзӯъҳои ҳамзистии мусолиҳатомези тамаддуну динҳо, эҳтиромгузорӣ ба ҳуқуқ ва озодиҳои ақалиятҳои динӣ ва қавмӣ дар Аврупо ва олами Ислом, инчунин, ҳодисаҳои ахири олами Ислом табодули назар сурат мегирад.
Гуфта мешавад, мавзӯъи нишасти навбатӣ Муҳиддин Кабирӣ доир ба равандҳои нигаронкунанда дар Миср ва роҳҳои баромадан аз ин буҳрони мавҷуд, ки баъд аз табаддулоти низомӣ дар ин кишвар ба вуҷуд омадааст ва мардум хостори баргашти президент ва ҳукумати мунтахаби хеш пайваста ба майдонҳо мерезанд, ибрози андеша хоҳад кард.
Қобили зикр аст, ки раҳбари ҲНИТ ягона ширкаткунанда миёни чеҳраҳои сиёсӣ-исломӣ ва мутафаккирон аст, ки намояндагии ҷаҳони форсизабононро то Индонезиё дар муколамаи исломӣ-аврупоӣ ба уҳда дорад.
