Аз оғози сол дар шаҳр ва ноҳияи Кӯлоб 23 корхона бо 300 ҷойи корӣ мавриди истифода қарор гирифт. Дар ин бора ба «Азия-Плюс» муовини раиси шаҳри Кӯлоб Нуриддин Бозоров хабар дод.
«Тамоми кӯшишҳои ифтитоҳи корхонаҳои хурди нав дар доираи барномаи 2 солаи сохтмони соҳибкорон оид ба рушди минбаъдаи шаҳри Кӯлоб сурат мегиранд», – гуфт ӯ ва илова намуд, ки давоми солҳои 2014-2015 соҳибкорон ният доранд, ки барои рушди шаҳр дар ҳаҷми 117 млн. 337 ҳазор сомонӣ маблағгузорӣ кунанд.
Н.Бозоров таъкид дошт, ки дар шаҳру ноҳияи Кӯлоб барои сохтмони 147 иншооти гуногун аллакай қитъаи замин ҷудо шудааст. «Агар дар деҳаҳо бештар ба сохтмони иншооти варзишиву солимӣ, хизматгузорӣ ва корхонаҳои хурди коркарди маҳсулоти кишоварзӣ таваҷҷуҳ зоҳир кунанд, дар шаҳр меҳмонхонаҳо, марказҳои фитнесу солимӣ, чойхонаҳо ва корхонаҳои истеҳсолии гуногун қомат меафрозанд», – иброз дошт номбурда.
Ёдрас мекунем, ки соли 2013 дар шаҳр ва ноҳияи Кӯлоб соҳибкорон бо маблағгузорӣ дар ҳаҷми 107 млн. сомонӣ 61 иншоотро ба истифода доданд.
