Бар асари садамаи нақлиёт дар минтақаи ҷануби кишвар шаш нафар ба ҳалокат расиданд.
Бино ба иттилои хадамоти матуоти ВКД ҶТ, ронандаи автомашинаи тамғаи «Мерседес-Бенс» сокини 28-солаи ноҳияи Панҷ Далерҷон Боймуродов ҳангоми ҳаракат дар роҳи мошингарди Қурғонтеппа-Румӣ дар қаламрави ноҳияи Бохтар бо суръати баланд ба автомашинаи тамғаи «Мерседес-Бенс» таҳти идораи сокини 32-солаи Душанбе Умедҷон Эмомов бармехӯрад.
Ба иттилои манбаъ, аз зарбаи сахт автомашинаи таҳти идораи Эмомов ба хатти муқобили ҳаракати роҳ баромада, ба автомашинаи боркаши тамғаи «КамАЗ» бархӯрдааст.
Гуфта мешавад, дар натиҷаи садама мусофирони «Мерседес-Бенс»-и дуюм, сокинони пойтахт – Фарзона Эмомоваи 26-сола, Рухшона Эмомоваи 27-сола, Парвина Эмомоваи 36-сола ва Беҳзод Ғафурови 6-сола дар ҷойи ҳодиса ба ҳалокат расидаанд. Ду тан аз мусофирони ин автомашина – Равшан Эмомови 2-сола ва Роҳила Ғафуроваи 5-сола аз ҷароҳатҳои бардошта дар бемористон фавтидаанд. Ронанда У.Эмомов, Хуршеда Эмомоваи 4-сола ва Ҳидоят Ишматоваи 56-сола дар бемористон бистарӣ шудаанд.
