Раиси Ассамблеяи миллӣ (палатаи поёнии парлумон)-и Покистон Сардор Аёз Содиқ, ки чанде қабл бо сафари расмӣ ба Душанбе ташриф овард, имрӯз бо рафти сохтмону муҷаҳҳазгардонӣ ва ороишоти Маркази фарҳангӣ-фароғатии «Тахти Наврӯз» шинос шуд.
Тавре ба «Азия-Плюс» як манбаъ аз ҳукумати ҷумҳурӣ иттилоъ дод, зимни шиносоӣ бо сохтмони иншоот меҳмони олиқадри хориҷиро муовини аввали раиси МНМО ҶТ Амиршо Миралиев ҳамроҳӣ кардааст.
Маркази фарҳангӣ-фароғатии «Тахти Наврӯз» дар рӯ ба рӯи Варзишгоҳи марказии ҷумҳурӣ, дар соҳили Кӯли ҷавонон қомат меафрозад. Бинои сеошёнаи марказ мутобиқи анъанаҳои чандинасраи меъморӣ ва ороишотии миллӣ ва ҳамчунин бо истифода аз технологияҳои муосири сохтмон бунёд мегардад.
Мувофиқи нақша, ягона Маркази фарҳангӣ-фароғатии «Тахти Наврӯз»-и кишвар бояд моҳи сентябри соли ҷорӣ ба истифода дода шавад. Қаблан хабар дода шуда буд, ки ин иншоот бояд яке аз чойхонаҳои бузургтарин дар ҷаҳон барои 2 ҳазор нафар ҷой шавад.
Қобили зикр аст, ки ба ин иншооти сохтмонаш ҳанӯз нотамом аллакай меҳмонони воломақоми Тоҷикистон таваҷҷуҳ зоҳир мекунанд. Моҳҳои март ва майи сол равон бо ҷараёни сохтмони он раиси Шӯрои Федератсияи Русия Валентина Матвиенко ва президенти Туркманистон Гурбангулӣ Бердимуҳаммедов шинос шуда буданд.
