Намояндагони ҷомеаи шаҳрвандӣ, ки ба ҳайати комиссияи муштараки таҳқиқи ҳодисаҳои Хоруғ шомиланд, бо намояндагони ҳукумат оид ба ифшо накардани ҷараёни тафтиши ҳодисаҳои Хоруғ тавофуқ ҳосил карданд.
Тавре ба «Азия-Плюс» Алим Шерзамонов, намояндаи ҷомеаи шаҳрвандии ВМКБ, узви комиссияи муштарак хабар дод, ин қарордод мутобиқи талаботи қонунгузории ҶТ дар бораи ифшо накардани маълумот бо мақсади тафтиши дақиқ ва воқеъбинона ба имзо расидааст. «Агар касе ҷузъиёти ҷараёни тафтишро ифшо кунад, ӯ аз ҳайати комиссия хориҷ карда мешавад», – таъкид дошт номбурда.
Алим Шерзамонов аз натиҷаҳои вохӯрии Прокурори генералии Тоҷикистон Шерхон Салимзода бо аҳли ҷомеаи вилоят изҳори қаноатмандӣ кард. «Ман шахсан бо Прокурори генералӣ мулоқо тнакардаам, зеро дигар сокинони шаҳр ҳамаи он чизеро, ки гуфтан лозим буд, ба ӯ расониданд», – афзуд ӯ.
Ёдрас мекунем, ки рӯзи 21-уми майи соли равон дар натиҷаи муноқишаи мусаллаҳона миёни кормандони милиса ва гурӯҳи ҷавонони маҳаллӣ як сокини шаҳри Хоруғ кушта ва 6 нафари дигар захмӣ шуданд, ки ду нафарашон баъдтар дар бемористон ба ҳалокат расиданд. Як корманди милиса – Давид Ниёзбеков низ ҳалок шуд. Биноҳои Шуъбаи ВКД Тоҷикистон дар шаҳри Хоруғ, суди вилоят ва прокуратура ба коми оташ рафтанд. Шаби ҷумъа ба шанбе (23-24-уми май) зимни ҳамла ба бинои Раёсати КДАМ дар ВМКБ сокини 20-солаи шаҳри Хоруғ Азамат Паллаев кушта ва боз ду нафар сокини маҳаллӣ ҷароҳат бардоштанд.
Қаблан ҷомеаи шаҳрвандии Вилояти Мухтори Кӯҳистони Бадахшон
як изҳороте қабул намуда
, дар он рӯйдодҳои хунини рӯзи 21-уми май дар шаҳри Хоруғро иқдоми тарҳрезишудаи мақомоти интизомӣ арзёбӣ кард. Дар ин гуфтушунидҳо бо намояндагони ҳукумат ҷомеаи шаҳрвандии ВМКБ-ро Музаффар Муборакшоев, ҳуқуқшинос Фаромӯз Эргашев, нафақахӯр Бахтовар Бахтиёров ва шаҳрванди бекор Хурсанд Мамадшоев намояндагӣ мекунанд. Ҳамчунин ба сифати нозирон ба ин рӯйхат раиси шӯрои маҳаллаи Хоруғи Боло Маҳмадбоқир Маҳмадбоқиров, раиси шӯрои маҳаллаи «Хлебзавод» Толиб Айёмбеков, раиси шӯрои маҳаллаи УПД Зоир Раҷабов, намояндаи ҷомеаи шаҳрвандӣ Ёғибек Ёғибеков, сардори Раёсати нерӯҳои марзбонии Бадахшон Холбаш Холбашев, раиси бахши ҲСДТ дар ВМКБ Алим Шерзамонов ва роҳбари ташкилоти ҷамъиятии «Номус ва инсоф» Улфат Мамадшоева шомил гардидаанд.
