Бо қарори раиси шаҳри Душанбе Маҳмадсаид Убайдуллоев, иҷлосияи нуздаҳуми Маҷлиси вакилони халқи шаҳри Душанбе даъвати чорум 31 июл дар толори Корхонаи воҳиди давлатии «Маркази равобити пойтахт» баргузор мешавад.
Бино ба иттилои хадамоти матбуоти мақомоти шаҳрдории пойтахт, дар иҷлосия масъалаҳои баргузор намудани Рӯзҳои шаҳри Душанбе ва ноҳияҳои он дар шаҳраку маҳаллаҳо ва омодагии пойтахт ба гузаронидани ҷаласаи навбатии Шӯрои сарони давлатҳои аъзои Созмони ҳамкории Шанхай баррасӣ мешаванд.
«Дар иҷлосия ҳамчунин муовинони раиси шаҳр Бурҳон Назаров ва Низом Ҳакимов оид ба иҷрои қароҳои қаблан қабулшудаи Маҷлиси вакилони халқи шаҳр «Дар бораи ташкили захираи маҳсулоти озуқаворӣ дар пойтахт» ва «Дар бораи ташкили фаъолияти муназзами хизматрасонии нақлиёти мусофиркаши истифодаи умум дар хатсайрҳои амалкунандаи ҳудуди шаҳри Душанбе» ҳисобот медиҳанд», – зикр мегардад дар хабар.
Гуфта мешавад, дар иҷлосия ҳамчунин ҷараёни номгузорӣ ва номивазкунии маҳаллаҳо, кӯчаҳо, майдонҳо, хиёбонҳо, боғҳо, пулҳо ва дигар қисмҳои таркибии маҳалҳои аҳолинишини шаҳри Душанбе низ муҳокима мешаванд.
«Бо қарори раиси пойтахт, барои ташкили кори иҷлосия гурӯҳи корӣ таъсис дода мешавад», – омадаст дар иттилоъ.
