– Бо пахши гузоришҳо дар бораи муллоҳои ҷодугар Кумитаи телевизион ва радиои назди ҳукумати ҶТ мақсади бадномкунии ягон ҳизберо надорад, – изҳор намуд зимни нишасти хабарӣ раиси Кумитаи мазкур Асадулло Раҳмон.
«Мо шаҳрвандонро аз фаъолияти муллоҳое огоҳ карданием, ки бо такя ба Ислом ё Қуръон ба фиреби онҳо машғуланд, зеро ин муллоҳо имрӯз бадбахтии ҷомеа мебошанд ва мо бояд ин амалҳоро пешгирӣ намоем», – шарҳ дод А.Раҳмон.
Дар ҳамин ҳол, бино ба гуфтаи муовини раиси Кумита Самад Ҳикматов дар баробари қабули барномаҳои телевизиони Тоҷикистон тариқи антенаҳои оддиву моҳвораӣ, барномаҳои шабакаҳои давлатии телевизион ва радиои Тоҷикистон акнун ба корбарони сомонаи интернетии Mediabay.tv низ дастрасанд. «Моҳи июн барномаҳои телевизиону радиои Тоҷикистонро тариқи ин сомона 94 ҳазору 186 нафар тамошову гӯш доданд, ки нисбат ба моҳи гузашта 17,73% бештар аст», – иброз дошт номбурда.
Зимнан зикр гардид, ки баронмаҳои телевизиону радиои Тоҷикистонро ассоан дар кишварҳое чун Русия, Қазоқистон, Чин, Кореяи Ҷанубӣ, Туркия, Озарбойҷон, Олмон, ИМА ва Юнон тамошову гӯш мекунанд.
