Дар мавсими гармои имсол 14 нафар шаҳрвандони вилояти Хатлон ҷони худро аз даст додаанд.
Бино ба гуфти сардори ситоди ҳолатҳои фавқулода ва мудофиаи граждании вилояти Хатлон Ҳотамшо Шарипов, ин шумор дар нисбати ҳамин давраи соли гузашта 3 нафар зиёд буда, ба дастаи наҷотдиҳии ситод пайдо намудани ҷасади се ғарқшуда то имрӯз муяссар нашудааст.
«Мо дар тамоми ҷойҳои хавфноки дарёҳо ва каналҳо навиштаҷотҳои мании обозиро часпонида будем. Мутаассифона, аз тарафи шаҳрвандон ин навиштаҷотҳо канда партофта шудаанд. Боиси нигаронист, ки дар вилоят ҷойҳои махсусӣ обозӣ хеле каманд. Масалан, дар шаҳри Қӯрғонтеппа ҳамагӣ ду ҳавзи обозӣ мавҷуд аст, ки талаботи шаҳрро қонеъ намекунад»- изҳор дошт Шарипов.
Зимнан зикр гардид, ки барои пешгирии ғарқшавии шаҳрвандон бояд ҳамаи мақомот ва қишрҳои ҷомеъа саҳмгузор бошанд.
