Кумитаи ҳолатҳои фавқулода ва мудофиаи гражданӣ (КҲФ ва МГ)-и назди ҳукумати Тоҷикистон аз санаи 22-юми июл ба реҷаи пурзӯри адои хизмат мегузарад.
Котиби матбуотии КҲФ ва МГ Тоҷикистон Ориф Нозимов ба «Азия-Плюс» дар ин робита иттилоъ дод, ки ин тасмими раҳбарияти Кумита ба пешгӯии обуҳавошиносон дар бораи рӯзҳои 22-23-юми июл шадидан гарм шудани ҳарорат марбут аст.
«Дар ин рӯзҳо болоравии сатҳи об дар тамоми дарёҳои кишвар ва фаромадани сел дар доманакӯҳҳо бар асари обшавии босуръати пиряхҳо дар назар аст. Аз ин рӯ, шаҳрвандон ва меҳмонони ҷумҳуриро ба ҳушёрӣ даъват мекунем», – гуфт Нозимов.
Дар ҳамин ҳол, бино ба маълумоти Муассисаи давлатии обуҳавошиносии кишвар, рӯзҳои 22-23-юми июл болоравии ҳарорат дар Душанбе то 40-42, вилояти Хатлон – то 33-38, Суғд – то 31-36 ва ВМКБ – то 21-26 дараҷа гармӣ дар назар аст.
