Барои супурдани имтиҳон аз таърих ва қонунгузории Русия, муҳоҷирони кориро зарур аст, ки ба 40%-и саволҳо посухи дуруст диҳанд. Дар ин бора бо истинод ба гуфтаҳои Анжела Должикова, муовини ректори Донишгоҳи дӯстии халқҳои Русия ИТАР-ТАСС хабар медиҳад.
«Дар имтиҳон роҳ додан ба иштибоҳот низ пешбинӣ шуда, аз 20 савол оид ба таърихи Русия танҳо ба 40% ҷавоби дурст додан зарур аст, – гуфтааст муовини ректор. – Ҳадди ниҳоии вақт барои супурдани имтиҳон 2,5 соат муқаррар шуд».
Должикова ҳамчунин зикр кардааст, ки риояи тартиботи имтиҳонсупорӣ дар аудиторияҳоро омӯзгорон назорат бурда, дар аксари марказҳои қабули имтиҳонҳо сабти видеойӣ анҷом дода мешавад.
Қобили зикр аст, ки шурӯъ аз 1-уми январи соли 2015 муҳоҷирони меҳнатие, ки дар Русия хоҳиши кор кардан доранд, бояд сертификат дар бораи супурдани имтиҳон аз забони русӣ, таърих ва қонунгузории Русияро дошта бошанд.
