Нахуствазири Тоҷикистон Қоҳир Расулзода бо ҷараёни сохтмони қитъаи роҳи оҳани Ваҳдат – Ёвон, роҳи оҳани ояндаи Душанбе – Қӯрғонтеппа шинос шуд.
Тавре сармушовири хадамоти матбуоти президенти ҶТ Субҳиддин Муҳиддинов хабар дод, дар қитъаи сохтмони роҳ ба нахуствазир маълумот додаанд, ки дар зарфи 11 моҳи соли ҷорӣ дар сохтмони қитъаи роҳи оҳани Ваҳдат – Ёвон 56 млн. сомонӣ маблағҳо азхуд карда шудаанд.
Ба иттилои манбаъ, зикр гардидааст, ки танҳо моҳи ахир дар ин иншоот беш аз 1,4 километр қисмати болои роҳи оҳан васл гардида, тайи 11 моҳи соли равон бошад, дар 2,4 километри роҳ корҳои васлкунии қисмати болоии роҳ анҷом дода шудаанд.
«Дар ҷаласаи сайёри ситоди корӣ бо ҳузури Қоҳир Расулзода аз иҷрои корҳо дар иншоот натиҷагирӣ шуда, нахуствазир ба шахсони масъул ҷиҳати андешидани тадбирҳо барои суръатбахшӣ ба корҳои таъмиру сохтмон дар қитъаи мазкур дастуру супоришҳо дод», – қайд кард Муҳиддинов.
