Рӯзи 11-уми декабри соли равон сафири Тоҷикистон дар Шоҳигарии Арабистони Саудӣ Азамшо Шарифӣ нусхаи Эътимодномаи худро ба муовини аввали вазири корҳои хориҷии ин кишвар шоҳзода Абдулазиз ибни Абдуллоҳ ибни Абдулазиз супорид.
Бино ба маълумоти департаменти иттилооти Вазорати корҳои хориҷии ҶТ, дар ҷараёни суҳбате, ки пас аз тақдими нусхаи Эътимоднома баргузор гардид, масъалаҳои марбут ба таҳким ва густариши муносибатҳои дуҷониба ва ҳамкориҳои мутақобилан судманди Тоҷикистон ва Арабистони Саудӣ дар арсаҳои мухталиф мавриди баррасӣ қарор гирифтанд.
Гуфта мешавад, шоҳзода Абдулазиз бо ишора ба сатҳи баланди робитаҳои сиёсии кишвари худ бо Тоҷикистон ҳавасмандии ҷониби Саудиро ба тавсеаи ҳамкориҳои гуногунҷабҳа, бахусус дар соҳаҳои тиҷорату иқтисод таъкид намуд.
