Президенти Тоҷикистон Эмомалӣ Раҳмон ба унвони президенти Қазоқистон Нурсултон Назарбоев ба муносибати солгарди ҷашни миллии Қазоқистон – Рӯзи истиқлолият барқияи табрикотӣ ирсол намуд.
Бино ба иттилои хадамоти матбуоти сарвари давлат, дар барқияи сарвари давлати Тоҷикистон таъкид мегардад, ки барои Тоҷикистон муносибатҳо бо Қазоқистон ҳамчун як ҷузъи асосии афзалиятноки сиёсати берунӣ ҳамеша боқӣ мемонанд.
«Мо барои рушди рӯзафзуни он ҳавасмандем ва омодаем барои дар амал татбиқ намудани иқтидори бузург ҷиҳати ҳамкориҳои мутақобилае, ки кишварҳоямон соҳибанд, тамоми корҳои заруриро анҷом диҳем», – омадааст дар барқия.
Дар барқия Эмомалӣ Раҳмон изҳори умед кардааст, ки тавассути кӯшишҳои муштарак Тоҷикистону Қазоқистон метавонанд он бойигарии бебаҳоеро, ки аз гузаштагон ба мерос гирифтаанд, боз ҳам ғанитар гардонанд.
