Пешвои ҳаракати «Гурӯҳи 24» Умаралӣ Қувватов рӯзи ҷумъаи ҳафтаи гузашта бинобар сабаби риоя накардани қоидаҳои будубош дар Туркия боздошт шудааст.
Тавре ба «Азия-Плюс» як манбаъ аз сохторҳои қудратии Тоҷикистон хабар дод, муҳлати дар қаламрави Туркия қарор доштани боздоштшуда бидуни қайд ба охир расида будааст. Қобили зикр аст, ки дар қаламрави Туркия шаҳрвандони Тоҷикистон метавонанд муддати 30 рӯз бидуни раводид иқомат кунанд, вале баъди гузашти ин муҳлат, бояд дар ин кишвар худро ба қайд гузоранд.
Рӯзи ҷумъаи ҳафтаи сипаришуда, 19-уми декабр дар шаҳри Истамбул пешвои ҳаракати мухолифи «Гурӯҳи 24» Умаралӣ Қувватов боздошт шуд. Дар ин бора роҳбари Анҷумани «Ҳуқуқи инсон дар Осиёи Марказӣ» Надежда Атаева
хабар медиҳад
. Далели боздошти Қувватовро дар саҳифаи худ адвокати сиёсатмадори тоҷик
Николай Николаев
низ тасдиқ мекунад.
Шаҳрванди Тоҷикистон Умаралӣ Қувватов айни замон дастрасии мақоми паноҳанда аз Раёсати Комиссари Олии умури гурезагони СММ-ро мунтазир аст.
Прокуратураи генералии Тоҷикистон Умаралӣ Қуввватовроба азхудкунии 6 млн. сомонӣ (беш аз 1,260 млн. $) муттаҳам карда, вале ӯ ин иттиҳомро беасос мехонад.
Анҷумани «Ҳуқуқи инсон дар Осиёи Марказӣ» аз ҳукуматдорони Туркия дархост намудааст, ки муқаррароти Конвенсияи СММ дар бораи мақоми паноҳандагон ва Конвенсия зидди шиканҷа ва дигар намудҳои муносибат ва ҷазои бераҳмона, ғайриинсонӣ ё таҳқиркунандаи шаъну шарафро иҷро намуда, меъёрҳои мурофиавии қонунгузории Туркия, аз ҷумла таъмини боздоштшуд бо адвокатро риоя намояд.
Анҷумани «Ҳуқуқи инсон дар Осиёи Марказӣ» маълумот дар бораи боздошти пешвои «Гурӯҳи 24» ва дигар ҳаммаслакони ӯ – Ҳусейн Ашӯров, Суҳроб Тӯраев ва Абдурашид Ҳомидовро ба Вазорати корҳои хориҷии Туркия, дафтари намояндагии Раёсати Комиссари Олии умури пааноҳандагон дар Туркия ва дафтари асосии ин Раёсат дар Женева ва ҳамчунин созмонҳои ҳомии ҳуқуқи Human Rights Watch, Amnesty International ва дигарон ирсол намудааст.
