Ҳизби сотсиал-демократии Тоҷикистон (ҲСДТ) тибқи рӯйхати ҳизбӣ 22 нафар номзадҳоро ба вакилӣ дар палатаи поёнии парлумон пешбарӣ намуд, ки дар он ғайриҳизбиён ҳам ҳузур доранд.
Дар садри рӯйхат Абдуназаров Амният, муовини раиси ҲСДТ ва Абдуманнонов Абдураҳим, роҳбари бахши ҳизб дар ноҳияи Ашт қарор дошта, ба рӯйхат ҳамчунин адвокат Файзинисо Воҳидова, раиси ҳизб Раҳматилло Зойиров, адвокат Бузургмеҳр Ёров ва ҳуқуқшинос Шуҳрат Қудратов, ки айни замон дар ҳабс қарор дорад, низ шомиланд.
Ҳамчунин ба рӯйхати ҲСДТ Мирҳусайн Назриев, роҳбари эътирофнашудаи Ҳизби сосиалистии Тоҷикистон, номзади илм, журналист Улфатхонум Мамадшоева, Маҳмурод Одинаев роҳбари ташкилоти ҷамиятии зидди шиканҷа ва иқтисодчӣ Ҳоҷимуҳаммад Умаров низ дохил карда шудаанд.
Бинобар сабабҳои молиявӣ Дилбар Самадова, муовини раиси ҲСДТ Шокирҷон Ҳакимов ва Зариф Ғуломов номзадии худро бозхонданд.
Ба гуфтаи Шокирҷон Ҳакимов, маблағгузорӣ ба омода кардани шиору лавҳа ва дигар маводи таблиғотӣ аз ҳисоби номзадҳо ба вакилӣ аз ҲСДТ ва ҳамчунин воситаҳои давлатии тибқи қонун муқарраршуда маблағгузорӣ мешавад.
Ёдрас мекунем, ки палатаи поёнии парлумони Тоҷикистон аз 63 нафар вакилон иборат аст, ки 22 нафар тибқи рӯйхатҳои ҳизбӣ аз ҳавзаи ягонаи умумиҷумҳуриявӣ ва 41 нафар вакилон аз ҳавзаҳои якмандатӣ интихоб карда мешаванд.
