Президенти Тоҷикистон Эмомалӣ Раҳмон дар маҷлиси тантанавӣ бахшида ба солгарди навбатии таъсисёбии Қувваҳои Мусаллаҳи Тоҷикистон, ки рӯзи 22 феврал дар маҷмааи давлатии «Кохи Ваҳдат» доир мегардад, иштирок ва суханронӣ мекунад.
Тавре ба «Азия-Плюс» як манбаъ аз ҳукумати ҷумҳурӣ иттилоъ дод, зимни суханронӣ сарвари давлат назди сарбозону афсарон оид ба таҳкими мудофиаи кишвар вазифаҳои нав гузошта, ҳамчунин ба хизматчиёни ҳарбии пешқадам мукофотҳо тақдим мекунад.
Солгарди навбатии таъсисёбии Қувваҳои Мусаллаҳи Тоҷикистон ҳамасола рӯзи 23 феврал ҷашн гирифта мешавад. Таҷлили ин ҷашн дар пойтахт ва дигар шаҳру навоҳии Тоҷикистон имсол бидуни гузаштҳои низомӣ баргузор мешавад.
Аз Вазорати мудофиаи Тоҷикистон дар ин робита иттилоъ доданд, ки ба муносибати ин ҷашн рӯзи 23 феврал дар тамоми қисмҳои низомӣ ва дигар воҳидҳои Қувваҳои Мусаллаҳ дастурхони идона ороста шуда, пешсафони хизмати ҳарбӣ бо мукофоту туҳфаҳои арзишманд сарфароз гардонида мешаванд. Санаи 21 феврал дар назди гулхани абадӣ дар боғи Ғалабаи пойтахт маросими гулчанбаргузорӣ аз ҷониби раҳбарияти Вазорати мудофиа доир мегардад.
