Раиси Ҳизби коммунисти Тоҷикистон (ҲКТ) Шодӣ Шабдолов, ки айни замон бо интихобкунадагони вилояти Хатлон вохӯриҳо анҷом медиҳад, аз рӯҳияву дастгирии онҳо қаноатманд аст.
Шодӣ Шабдолов ба «Азия-Плюс» дар ин робита иттилоъ дод, ки мулоқоту вохӯриҳо бо сокинони вилояти Суғд ва минтақаи Кӯлоби вилояти Хатлон собит месозанд, ки шиорҳои асосии коммунистон дар бораи таъмини баробарии иҷтимоӣ, муҳайё сохтани шароитҳои яксон барои кор, истироҳат, дастрасӣ ба маорифу тандурустӣ, таъмини аҳолӣ бо манзили зист ҳеҷ гоҳ барои мардуми заҳматкаш бегона нестанд.
«Имрӯз, 23 феврал мо бо сокинони минтақаи Қӯрғонтеппаи вилояти Хатлон як қатор вохӯриҳо мегузаронем, ки дар онҳо ба мардум андешаву афкори худ оид ба таъмини ҳаёти шоиста дар кишвар ва ҳалли мушкилоти мавҷударо шарҳу тавзеҳ медиҳем. Зимни вохӯриҳо бо интихобкунандагон мо ба фаҳми як чиз расидем, яъне барои касоне, ки воқеъан ҳам баҳри ҳимояи ҳуқуқу манфиатҳои мардум мубориза мебаранд, ҳеҷ гоҳ пешашон рафта, ба чашмони онҳо рост нигоҳ кардан шармовар нест», – таъкид кард пешвои коммунистони кишвар.
