Дар зарфи 2 моҳи соли равон ба Тоҷикистон ҳудуди 95 ҳазор тонна маҳсулоти нафтӣ ворид карда шуд, ки нисбат ба ҳамин давраи соли гузашта қариб 31% камтар аст.
Тавре ба «Азия-Плюс» аз Агентии омори назди президенти ҶТ хабар доданд, давоми моҳҳои январ-феврали соли 2015 ба Тоҷикистон ба маблағи 67,3 млн. доллари ИМА 94,7 ҳазор тонна маҳсулоти нафтӣ интиқол дода шудааст. Тӯли 2 моҳи соли 2014 ба Тоҷикистон ба маблағи 114,3 млн. доллари ИМА 136,9 ҳазор тонна маҳсулоти нафтӣ ворид гардида буд.
Тибқи маълумоти Агентии омор, ба Тоҷикистон соли 2012 — 373,7 ҳазор тонна, соли 2013 – 375,8 ҳазор тонна ва соли 2014 – 579,8 ҳазор тонна маҳсулоти нафтӣ ворид гардидааст. Маҳсулоти нафтӣ ба Тоҷикистон асосан аз Русия интиқол дода мешаванд.
Ёдрас мекунем, ки аввали соли равон мақомоти дахлдори марбут ба бахши энергетикаи Тоҷикистону Русия оид ба
тавозуни индикативии сӯзишворӣ дар соли 2015
ба мувофиқа расиданд. Тибқи тавофуқоти ҳосилшуда, соли ҷорӣ аз Русия ба Тоҷикистон бояд 830 ҳазор тонна маҳсулоти нафтӣ бидуни пардохти боҷи содиротӣ интиқол дода шавад.
Соли 2014 тавозуни индикативӣ барои Тоҷикистон 1 млн. тонна муқаррар шуда, аммо ба ҷумҳурӣ муяссар гардид, ки ҳамагӣ каме бештар аз нисфи ин миқдор маҳсулоти нафтиро аз Русия дастрас намояд.
