Бо фармони президенти Тоҷикистон муовини сарвазири Тоҷикистон Муродалӣ Алимардон аз вазифааш озод карда шуд.
Бино ба иттилои хадамоти матбуоти сарвари давлат, Муродалӣ Алимардон бо сабаби ба кори дигар гузаштан аз мансаб барканор шудааст, вале аз ба кадом мансаби дигар таъин шудани ӯ маълумот дода намешавад.
Муродалӣ Алимардон 20 апрели соли 1960 дар ноҳияи Ҳисор таваллуд шудааст. Маълумоташ олӣ, соли 1983 Донишгоҳи давлатии Тоҷикистонро бо ихтисоси иқтисодчӣ хатм кардааст.
Фаъолияти меҳнатиашро соли 1983 ба сифати иқтисодчии Бонки давлатӣ дар ноҳияи Сино оғоз намуда, сипас дар вазифаҳои иқтисодчии калон, сардори шуъбаи қарздиҳии Бонки давлатӣ ва сардори шуъбаи қарздиҳии Бонки «Агропромбонк» дар ноҳияи Ҳисор фаъолият намудааст.
Солҳои 1992-1994 дар вазифаи Раиси Раёсати Бонки саҳомию тиҷоратии Агропромбонк «Шарқ» ва то соли 2008 дар вазифаи Раиси Бонки миллии Тоҷикистон кор кардааст. Аз январи соли 2008 дар вазифаи муовини Сарвазири Ҷумҳурии Тоҷикистон кор мекунад.
Барои фаъолияти меҳнатиаш бо унвони «Корманди шоистаи Тоҷикистон», ордени «Исмоили Сомонӣ» дараҷаи II ва медали ҷашнии «20-солагии Истиқлолияти давлатии Ҷумҳурии Тоҷикистон» сарфароз гардидааст. Оиладор, соҳиби 7 фарзанд мебошад.
Бо Фармони Президенти Ҷумҳурии Тоҷикистон аз 23 ноябри соли 2013 муовини Сарвазири Ҷумҳурии Тоҷикистон таъин гардида буд.
