Дорандаи медалҳои биринҷии Бозиҳои олимпӣ оид ба дзюдо, варзишгари тоҷик Расул Боқиев пас аз таваққуфи тӯлонӣ ба иштирок дар мусобиқаҳо шурӯъ намуд.
Дар мусобиқа бахшида ба 70-солагии Ғалаба дар Ҷанги Бузурги Ватанӣ дар маҷмааи варзишии Сарраёсати ВКД Русия дар шаҳри Маскав ӯ дар вазни 90 кило мақоми аввалро соҳиб шуд. Дар қувваозмоии ниҳоӣ ӯ ба рақибаш аз Маскав Сергей Попов дастболо шуд.
Гуштигири тоҷик Расул Боқиев Устоди шоистаи варзиши Тоҷикистон, дорандаи медалҳои биринҷӣ оид ба дзюдо дар Бозиҳои олимпии Пекин-2008, дорандаи медалҳои биринҷии Чемпионати ҷаҳон дар Рио-де-Жанейро-2007, ғолиби мусобиқаҳои Ҷоми ҷаҳон дар солҳои 2007, 2010, 2011 ва 2012 аст. Ӯ 2 марти соли 1982 дар ноҳияи Рӯдакӣ дар оилаи гуштигири маъруфи тоҷик Худойназар Боқиев ба дунё омадааст.
