Фармондеҳи Дастаи таъиноти махсуси милиса ё ОМОН-и ВКД Тоҷикистон полковник Гулмурод Ҳалимов бо дархости ҳукуматдорони Тоҷикистон мавриди пайнарди қонунии байнулмилалӣ эълон шуд. Ин элон дар
сомонаи расмии
Созмони байнулмилалии пулиси ҷиноӣ (Интерпол) ҷойгир шудааст.
Дар маълумотномаи нашршудаи Интерпол оид ба Гулмурод Ҳалимов зикр мегардад, ки ӯ 14 майи соли 1975 дар ноҳияи Варзоби Тоҷикистон таваллуд шуда, миллаташ тоҷик аст. Гуфта мешавад, ӯ донандаи забонҳои тоҷикиву русӣ ва англисӣ буда, вазнаш 80 кило ва қадаш 1 меру 80 сантиметр аст.
Гулмурод Ҳалимов, ки аз рӯзи 23 апрел беадарак шуда буд, санаи 27 май тариқи шабакаҳои иҷтимоӣ
навори видеоӣ интишор намуд,
ки дар он ба сафҳои ҷангиёни Давлати исломии Ироқу Шом (ДИИШ) пайвастанашро тасдиқ мекунад.
Дар навори видеоии 12 дақиқаву 20 сония Г.Ҳалимов бо забони русӣ мегӯяд, ба нишони эътироз ба тарзу усулҳои кори ВКД Тоҷикистон, ки ба хондани намозу ба бар кардани сарулибоси исломӣ иҷозат намедиҳад ва ҳамчунин алайҳи размоишҳои муштарак бо Русия ва ИМА, ӯ ин роҳро интихоб намудааст.
Рӯзи 30 май намояндаи Департаменти давлатии ИМА ба
CNN
тасдиқ кард, ки Гулмурод Ҳалимов чандин маротиба дар давраҳои омӯзишӣ дар ИМА таълим гирифта, малакаҳои роҳандозии амалиёти зиддитеррористиро азхуд намудааст.
Тавре
қаблан иттилоъ дода будем
, фармондеҳи ДТММ)-и ВКД Тоҷикистон полковник Гулмурод Ҳалимов аз аввали моҳи бедарак шуда, ба кор намеомад ва макони будубоши ӯ низ ба касе маълум набуд. Хешону наздиконаш низ аз макони будубоши ӯ огаҳӣ надоштанд.
Дар ҳамин ҳол, ахири ҳафтаи сипаришуда, Саидмурод Ҳалимов, бародарбузурги фармондеҳи ОМОН ВКД Тоҷикистон Гулмурод Ҳалимов,
аз бародараш даъват кард
, ки ба Тоҷикистон баргашта, назди қонун ҷавоб гӯяд.
