Зимни суханронии имрӯза дар Конфронси сатҳи баланд оид ба натиҷагирии Даҳсолаи байналмилалии амал “Об барои ҳаёт”, 2005-2015 дар Душанбе нахуствазири Қирғизистон Темир Сариев изҳор намуд, ки кишвари ӯ ва Тоҷикистон ба зиёни худ барои захираҳои обиашон, ки ба кишварҳои поёноб медиҳанд, ҷуброн намегиранд.
Ба гуфтаи ӯ, Конвенсияҳои СММ ҳамеша аз ҷониби кишварҳои поёноби минтақаи Осиёи Марказӣ аз нигоҳи сиёсӣ ба нафъи худашон шарҳ дода мешаванд.
«Дар мавсими зимистон Қирғизистон аз ҳисоби ҷорӣ кардани маҳдудияти истифолаи нерӯи барқ ба аҳолии кишвар, барои эҳтиёҷоти мавсими тобистони кишоварзони кишварҳои поёноб дар нерӯгоҳи Токтогул обро захира мекунад, вале дар ивазаш чизе намегирад», – иброз дошт нахуствазири кишвари ҳамсоя.
Сариев таъкид дошт, ки созишномаи баимзорасида миёни Қирғизистону Қазоқистон дар бораи истифодаи муштараки дарёҳои фаромарзӣ метавонад ба сифати як модули ҳамкориҳои кишварҳои минтақа хизмат кунад.
«Созишномаи зикршуда манфиатҳои ҳам Қирғизистону ҳам Қазоқистонро ба инобат мегирад», – афзуд нахуствазири Қирғизистон.
