Хадамоти алоқаи назди ҳукумати ҶТ аз ширкатҳои мобилӣ талаб кард, ки аз 1 июл барои истифода аз рақам дар ҳаҷми 80 дирам пардохти моҳона ҷорӣ созанд.
Ширкатҳои мобилӣ дар сомонаҳои расмии худ дар ин бора хабар додаанд, ки дар асоси Фармоиши Хадамоти алоқаи назди Ҳукумати Ҷумҳурии Тоҷикистон таҳти № 1-649 аз 09.06.2015с. ва Нархномаи ҳаққи пардохти захираҳои рақамгузории Ҷумҳурии Тоҷикистон, ки аз ҷониби Хадамоти алоқаи тасдиқ карда шуда, бо Хадамоти зиддиинҳисории назди Ҳукумати Ҷумҳурии Тоҷикистон мувофиқа карда шудааст, аз санаи 01.07.2015с. пардохти муштарӣ барои истифодаи ҳар як рақам ба андозаи 80 дирам муқаррар карда мешавад.
«Хоҳишмандем ба инобат гиред, ки пардохти муштарипулии моҳона алоҳида барои ҳар як рақаме, ки Шумо аз он истифода мебаред, ситонида мешавад», – омадааст дар маълумоти ширкатҳои мазкур.
Тибқи маълумоти ахир, дар Тоҷикистон бо аҳолии беш аз 8 млн. нафар айни замон 11, 2 млн. муштариёни ширкатҳои алоқаи мобилӣ ба қайд гирифта шудаанд, ки аз ин шумор сим-кортҳои ҳудуди 6,5 млн. нафарашон фаъол будаанд.
Бино ба маълумоти ҶДММ «Вавилон-Т», бо фармоиши Хадамоти алоқа, ки дар газетаи «Садои мардум аз 26.05.2015 сол №72 (3373) нашр шудааст, аз 1 июли соли 2015 дар тамоми нақшаҳои тарифӣ, аз ҷумла телефонҳои статсионарӣ (хонагӣ)) ва рақамҳои NGN бо назардошти андозҳо барои ҳар як рақам 50 дирам пардохти моҳона муқаррар шудааст.
