Муовини директори генералии Ширкати миллии тақсимоти маҳсулоти нафтии Эрон Мансур Риёҳӣ изҳор доштааст, ки соли равон сӯзишвории дизелӣ (солярка)-и Эрон ба бозорҳои нав, аз ҷумла ба давлатҳои Арманистону Тоҷикистон
интиқол дода мешавад
. Дар ин бора хабаргузории Иран.ру иттилоъ медиҳад.
Ба гуфтаи Мансур Риёҳӣ, дар робита ба афзоиши ҳаҷми истихроҷи гази табиӣ, истеъмоли сӯзишвории моеъ дар нерӯгоҳҳои барқӣ ва корхонаҳои саноатии дохили Эрон кам ва миқдори зиёди ин навъи сӯзишворӣ захира шудааст. «Аз ин рӯ, тасмим гирифта шуд, ки он ба кишварҳои ҳамсоя содирот мешавад», – иброз доштааст ӯ.
Номбурда зикр кардааст, ки айни замон сӯзишвории дизелӣ аз Эрон ба Афғонистон, Ироқ ва Нахичевон содирот шуда, соли равон интиқоли он ба бозорҳои нав, аз ҷумла Тоҷикистону Арманистон оғоз гардида, ҳамчунин масъалаи содироти маҳсулоти нафтӣ (сӯзишвории дизелӣ ва керосин) ба Курдистони Ироқ низ мавриди баррасӣ қарор дорад.
Гуфта мешавад, Ширкати миллии тақсимоти маҳсулоти нафтии Эрон ният дорад, ки тариқи бозорҳои тиҷорати наздимарзӣ бозори фурӯши маводи сӯхташро густариш бахшад, то ки аз аз роҳи қочоқ ба хориҷи кишвар баровардани он пешгирӣ кунад.
