Кумитаи ҷавонон варзиш ва сайёҳии назди ҳукумати Тоҷикистон барои мақолаи беҳтарин дар мавзӯи “Асосгузори сулҳу Ваҳдати миллӣ-Пешвои миллат” ва иншои беҳтарин дар мавзӯи “Ҷавонон пайрави Пешвои миллат” озмун эълон кард.
Бино ба иттилои сомонаи расмии Кумита, ин иқдом бо мақсади баланд бардоштани маърифати ҷавонон ва омӯзиши азхудкунии ҳаёту фаъолият, корнамоиву қаҳрамониҳои Асосгузори сулҳу Ваҳдати миллӣ, Пешвои миллат Эмомалӣ Раҳмон роҳандозӣ мешавад.
«Озмунҳои ҷумҳуриявии мақолаи беҳтарин байни донишҷӯён, олимон ва муҳаққиқони ҷавон дар мавзӯи “Асосгузори сулҳу Ваҳдати миллӣ-Пешвои миллат” ва иншои беҳтарин дар байни муҳассилини мактабҳои миёнаи умумӣ дар мавзӯи “Ҷавонон пайрави Пешвои миллат” гузаронида мешаванд», – омадааст дар маълумот.
Гуфта мешавад, ғолибонро тӯҳфаҳои омоданамудаи Кумита интизор аст. Ҳамчунин зикр мегардад, ки мӯҳлати қабули мақола ва иншои беҳтарин то санаи 20 апрели соли ҷорӣ муқаррар карда шудааст.
