Сафири Тоҷикистон дар ИМА Фарҳод Салим зимни суханронӣ дар Маркази байнулмилалии савдо ба номи Роналд Рейган дар Вашингтон ба ҳозирин доир ба имконоти сармояугзорӣ дар Тоҷикистон, захираҳои обиву энергетикӣ, сайёҳӣ, рушди коммуникатсия ва бахши аграрии ҷумҳурӣ маълумот дод.
Дар маърӯзаи худ дипломати тоҷик аз ҷумла ба масъалаи талошҳои ҳукумати Тоҷикистон дар самти ноил гардидан ба се ҳадафи стратегӣ – раҳоии кишвар аз бунбасти коммуникатсионӣ, таъмини амнияти энергетикӣ ва озуқаворӣ таваҷҷуҳ зоҳир намуд.
Фарҳод Салим ҳамчунин ба саволҳои сершумори иштирокдорони чорабинӣ, ки миёнашон намояндагони сохторҳои расмии ИМА ва доираҳои тиҷоратӣ, дипломатҳо, муҳаққиқон ва рӯзноманигорон ҳузур доштанд, посух гуфт.
Қобили зикр аст, ки ин вохӯрӣ бо сафири Тоҷикистон бо мусоидати ширкати The Washington Intergovernmental Professional Group, ба ташкили вохӯриҳо бо аъзои Конгресс ва дипломатҳои хориҷии муқими пойтахти ИМА машғул аст, созмон дода шуд.
