Зимни суханронӣ дар иҷлосияи имрӯзаи палатаи болоии парлумон прокурори генералии Тоҷикистон Раҳмон Юсуф Аҳмадзода изҳор намуд, ки ахири соли гузашта дар сохтори дастгоҳи марказии Прокуратураи генералӣ Раёсати пешгирӣ ва мубориза бо терроризм ва ҳамчунин шуъбаи амнияти дохилӣ таъсис дода шуда, ин сохторҳо дар як муддати кӯтоҳ 18 ҷинояти марбут ба коррупсияи аз ҷониби кормандони мақомоти прокуратура содиршударо ошкор кардаанд.
Ӯ изҳори таассуф намуд, ки сохторҳои қудратии ҷумҳурӣ, аз ҷумла мақомоти прокуратура ошӯби низомии санаи 4 сентябри соли 2015-ро пешгирӣ накарда, аз замони омодагириаш ошкор карда натавонистанд.
Раҳмон Юсуф Аҳмадзода қайд кард, ки тафтиши парвандаҳои ҷиноӣ нисбати 199 афроди гумонбар ба ташкил ва иштирок дар исёни мусаллаҳонаи моҳи сентябри соли гузашта таҳти раҳбарии собиқи мувини вазири мудофиа Абдуҳалим Назарзода (Ҳоҷӣ Ҳалим) ба итмом расида, ҷиҳати баррасӣ ба Суди олии ҷумҳурӣ ирсол шудааст.
Ба гуфтаи ӯ, аз 199 нафар, ки нисбаташон айбнома эълон шудааст, 179 нафарашон узви Ҳизби фаъолияташ дар қаламрави ҷумҳурӣ манъшудаи наҳзати исломӣ набуда, 40 нафар иштирокчиён ва созмондиҳандагони исён мавриди ҷустуҷӯи байнулмилалӣ эълон шудаанд ва 36 тан аз иштирокчиёни он зимни амалиёти махсус кушта шудаанд.
Прокурори генералӣ зикр кард, ки айни замон ба маблағи умумии 151 млн. сомонӣ иншооти мутааллиқ ба иштирокчиён ва созмондиҳандагони исён таҳти ҳабс қарор дошта, тафтиши маблағгузории исён аз ҷониби кишварҳои хориҷӣ ва шаҳрвандони он идома дорад.
