Зимни баргузории амалиёти махсус оид ба пешгирии ҳодисаҳои муомилоти ғайриқонунии маводи мухаддир дар қаламрави шаҳри Кӯлоб, шаҳрванди 36-солаи Афғонистон, зодаи ноҳияи Хоҳони вилояти Бадахшон боздошт шуд.
Дафтари матбуоти ВКД Тоҷикистон дар шарҳи ин маълумот менависад, гумонбаршуда, аъзои гурӯҳи муташаккили ҷиноӣ мансуб ёфта, аз ӯ дар маҷмӯъ 107 килою 646 грамм маводи нашъадор, аз инҳо 97 килою 424 грамм маводи нашъадори бангдона, 9 килою 266 грамм маводи ҳашиш ва 956, 8 грамм маводи нашъаовари афюн дарёфт ва мусодира карда шудааст.
Гуфта мешавад, кормандони милиса ба гумони даст доштан ба муомилоти ғайриқонунии маводи нашъаовар ҳамчунин сокини 55-солаи шаҳри Кӯлобро низ боздошт намуда, аз ӯ зиёда аз 9 кило маводи мухаддири ҳашишро дарёфт ва мусодира кардаанд.
Зимнан зикр мегардад, ки аз рӯи далелҳои дар боло зикршуда парвандаҳои ҷиноӣ боз шуда, тафтишот дар ин самт идома дорад.
