Комиссияи марказии интихобот ва раъйпурсӣ (КМИР)-и Тоҷикистон натиҷаҳои пешакии маъракаи Раъйпурсии умумихалқии санаи 22 майро эълон кард.
Зимни нишасти хабарии имрӯза раиси КМИР Бахтиёр Худоёрзода изҳор намуд, ки сатҳи ҳузури интихобкунандагон дар маъракаи Раъйпурсӣ оид ба ворид намудани тағйиру иловаҳо ба Конститутсияи ҷумҳурӣ 92%-ро ташкил додааст.
«Дар маъракаи раъйпурсӣ 4 млн. 38 ҳазору 183 нафар шаҳрвандони кишвар иштирок карданд, ки аз 4 млн. 401 ҳазору 516 шаҳрвандони аз ҷониби КМИР бақайдгирифта ҷиҳати иштирок дар ин маърака 92%-ро ташкил медиҳад», – иброз дошт номбурда.
Ба гуфтаи раиси КМИР, аз ин шумор ба ҷонибдории ворид намудани тағйиру иловаҳо ба Конститутсия 3 млн. 477 ҳазору 183 нафар ва мухолифи он 134 ҳазору 171 нафар шаҳрвандони овоз додаанд, ки аз шумори умумии интихобкунандагон мутаносибан 94,5% ва 3,3%-ро ташкил медиҳад.
«Дар ҷараёни омодагӣ ва баргузории раъйпурсӣ аз ҷониби шаҳрвандони дар ин маърака иштироккарда ва ҳамчунин нозирон ба КМИР ҳеҷ шикояте ва ё аризае пешниҳод нашудааст», – изҳор дошт Худоёрзода.
Зимнан раиси КМИР Тоҷикистон ба шаҳрвандони кишвар барои иштироки фаъолонаашон дар ин маърака миннатдорӣ изҳор намуд.
