Ҳаракати Толибон ба ҷойи пешвои пешини кушташудаи худ Мулло Ахтар Муҳаммад Мансур роҳбари нав таъин кард.
Бино ба маълумоти BBS News, Мулло Ҳайбатуллоҳ Охунзода раҳбари нави ин гурӯҳ таъин шудааст. Нисбат ба роҳбарони пешинаи гурӯҳ, доир ба пешвои нави ҳаракати Толибон маълумоти зиёд дастрас нест.
Ёдрас мекунем, ки шоми рӯзи ҷумъаи ҳафтаи сипаришуда Мулло Ахтар Мансур дар минтақаи назди марзи Афғонистону Покистон кушта шуд. Associated Press бо истинод ба изҳороти мулло Абдул Рауф иттилоъ дода буд, ки ӯ дар натиҷаи ҳамлаи ҳавопаймоҳои бесарнишини амрикоӣ ба ҳалокат расида, ҳангоми ҳамла дар автомашинаи худ қарор доштааст.
Ба ҳамлаи ҳавоӣ ба пешвои Толибон аз ҷониби президенти ИМА Барак Обама дастур дода шуда, ӯниз марги пешвои ин гурӯҳро
тасдиқ кард.
Мулло Ахтар Мансур тобистони соли гузашта баъди марги муассиси ҳаракат Мулло Умар роҳбари расмии ҳаракати Толибон шуд. Мансур муовини Мулло Умар буда, беш аз ду сол марги сардори худро пинҳон дошт ва аз номи ӯ то аз ҷониби ҳукумати Афғонистон ошкор шудани марги роҳбари ташкилот, ба гурӯҳи Толибон роҳбарӣ мекард.
