Корхонаҳои истеҳсоли ангишти Тоҷикистон ба истихроҷи 1,7 млн. тонна ҳаҷми рекордии ин навъи сӯзишвории дурушт то охири соли равон уҳдадор шуданд.
Бино ба иттилои хадамоти матбуоти Вазорати саноат ва технологияҳои нави ҶТ, аз аввали сол то имрӯз корхонаҳои соҳа истихроҷи ангиштро ба зиёда аз 770 ҳазор тонна расониданд, ки нисбат ба ҳамин давраи соли сипаригардида 254 ҳазор тонна зиёд аст.
Ба истеҳсоли ин навъи сӯзишворӣ дар кишвар 18 корхона машғул мебошанд. Корхонаҳои нисбатан бузург – КФ «Ш.Фон-Яғноб», ҶДММ «Талко-Ресурс», КФ КА «Зиддӣ» ва ҶСК «Ангишт» то охири сол дар маҷмӯъ ба истихроҷи 1,5 млн. тонна ангишт уҳдадор шуда, боз ҳудуди 200 ҳазор тонна дар 12 корхонаи боқимондаи ин соҳа истихроҷ хоҳад шуд.
Тибқи маълумоти Вазорати саноат ва технологияҳои нави ҶТ, айни замон беш аз 200 корхона дар ҷумҳурӣ ба сифати сӯзишворӣ аз ангишт истифода мекунанд.
Қобили зикр аст, ки тайи ду соли ахир дар Тоҷикистон ҳаҷми рекордии ангишт истихроҷ мешавад. Соли 2014 – 870 ҳазор тонна ва соли 2015 – беш аз 1 млн. тонна ангишт истеҳсол шуд. То ин дам дар кишвар ҳамагӣ 17 ҳазор тонна ин навъи сӯзишворӣ истихроҷ мешуд. То замони соҳибистиқлол шудани ҷумҳурӣ, ҳаҷми истихроҷи ангишт дар Тоҷикистон ҳамагӣ ба 309 ҳазор тонна мерасид.
Шурӯъ аз 1 марти соли 2013 содироти ангишт аз Тоҷикистон манъ шуд. Ба ин васила ҳукумати ҷумҳурӣ вобастагии кишварро аз воридоти сӯзишворӣ камтар ва истифодаи онро пурсамар карданист. Баҳори соли 2012 қонун «Дар бораи ангишт» қабул шуд, ки ба ҷалби сармоягузории нав ба ин бахш нигаронида шудааст.
