Зимни суханронӣ дар музокироти умумии Маҷмаи умумии СММ вазири корҳои хориҷии Тоҷикистон Сироҷиддин Аслов изҳор намуд, ки дар сурати мавҷуд будани иродаи сиёсӣ ва бахусус таҳкими ҳамкориву ҳамоҳангсозӣ, ҳаллу фасли мушкилоти об имконпазир аст.
«Мо мушоҳида кардем, ки вақте кишварҳо ё минтақаҳо масъалҳои марбут ба обро муҳим мешуморанд, ҳаллу фасли онҳо кори имконпазир аст. Як чиз возеҳ аст: давлатҳо ва ҷомеаи байнулмилалӣ дар маҷмӯъ бояд ҳамроҳ кор кунанд, кӯшишҳои ҳамоҳангшуда ба харҷ дода, тадбирҳо дар ин соҳаро мувофиқа созанд», – иттилоъ медиҳад Маркази иттилооти СММ бо истинод ба гуфтаҳои вазири тоҷик.
Аслов қайд кардааст, ки ин масъала бахусус ба захираҳои обӣ дахл дорад, ки дар бахшҳои гуногун, аз қабили тандурустӣ, кишоварзӣ, энергетика ва ғайра истифода шуда, аз он дар як вақт ҷамоатҳо ва кишварҳои гуногун баҳра мебардоранд.
Вазир хотиррасон кардааст, ки дар симпозиуми моҳи августи Душанбе, ки аз ҷониби Тоҷикистон ва СММ созмон дода шуд, Даъват ба амал дар соҳаи дастрасӣ ба об ва санитария қабул шуд. Ӯ ҳамчунин изҳори умедворӣ намуд, ки Маҷмаи Умумии СММ аз ташаббуси давраи солҳои 2018-2028-ро даҳсолаи «Об баҳри ҳаёт» эълон кардан дастгирӣ мекунад.
Сироҷиддин Аслов таъкид дошт, ки дар Рӯзномаи нави рушди устувори инсоният дар 15-солаи наздик об ба сифати яке аз таркибҳои муҳимтарини рушд дониста мешавад ва иҷрои вазифаҳои дар ин самт гузошташуда имконпазиранд.
Қобили зикр аст, ки қаблан вазири корҳои хориҷии Ӯзбекистон Абдулазиз Комилов низ дар ин чорабинии СММ суханронӣ намуда, дар робита ба мушкилоти хушкшавии баҳри Арал бори нахуст тайи солҳои ахир аз нигарониҳо нисбати сохтмони иншооти нави бузурги гидроэнергетикӣ дар Тоҷикистон ва Қирғизистон ҳарфе нагуфт.
