Раиси шаҳри Душанбе Рустами Эмомалӣ Нақшаи чорабиниҳои мақомоти шаҳрдории пойтахт оид ба омодагӣ ва таҷлили ҷашни 26-солагии Истиқлолияти давлатии Тоҷикистонро тасдиқ кард.
Бино ба иттилои дафтари матбуоти мақомоти шаҳрдории пойтахт, чорабинии асосии идона бахшида ба ҷашни Рӯзи истиқлолияти Тоҷикистон шоми рӯзи 9 сентябр дар Варзишгоҳи марказии ҷумҳуривӣ доир мегардад ва дар он ба сокинону меҳмонони пойтахт намоиши театрикунинидашуда бо иштироки ҳунармандони шинохтаи кишвар пешкаш мегардад.
Гуфта мешавад, бо қарори раиси пойтахт чорабиниҳои идона бахшида ба ин ҷашн дар тамоми ноҳияҳои шаҳр ва боғҳои фароғату истироҳати пойтахт баргузор шуда, то фарорасии ҷашн дар қаламрави шаҳр даҳҳо иншооти нави таъиноти гуногуни иқтисодиву иҷтимоӣ мавриди баҳрабардорӣ қарор мегиранд.
Қобили зикр аст, ки ба муносибати таҷлили ҷашни 26-умин солгарди Истиқлолияти давлатии Тоҷикистон дар шаҳри Душанбе баргузории гузашти низомӣ дар назар нест.
