Тӯли се моҳи соли ҷорӣ Тоҷикистон ба хориҷи кишвар ба маблағи каме бештар аз 243 млн. доллар молу маҳсулот содирот кард.
Бино ба маълумоти Агентии омори назди президенти ҶТ, ҳаҷми воридоти маҳсулот ба Тоҷикистон дар ин давра беш аз 790 млн. долларро ташкил додааст. Тавозуни савдо манфӣ ва ба 547,6 млн. доллар баробар аст.
Семоҳаи аввали соли равон ҳаҷми муомилоти моли хориҷии Тоҷикистон ба сурати умум 1 млрд. 33,7 млн. долларро ташкил додааст, ки нисбат ба ҳамин давраи соли гузашта 258,5 млн. доллар ё худ 33,3 фоиз зиёдтар мебошад.
Дар ин давра Тоҷикистон бо 90 кишвари саросари дунё муомилоти молӣ дошт. Шарикони асосии тиҷоратии Тоҷикистон тӯли се моҳи соли 2018 Русия (муомилоти моли дуҷониба – 228 млн. доллар), Қазоқистон (204 млн. доллар), Чин (130 млн. доллар), ИМА (108 млн. доллар) ва Туркия (91 млн. доллар) шуморида мешаванд.
Қобили зикр аст, ки Тоҷикистон ба хориҷи кишвар асосан ашёи хом содирот мекунад. Қариб нисфи ҳаҷми содирот кишвар дар семоҳаи аввали соли 2018 ба маҳсулоти минералӣ рост меояд.
Ба Тоҷикистон қариб пурра маҳсулоти тайр ворид карда мешавад. Қариб сеяки воридоти имсоларо воситаҳои нақлиёт ва таҷҳизот ташкил доданд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
