Ба ифтихори 73-юмин солгарди Рӯзи Ғалаба дар Ҷанги Бузурги Ватании солҳои 1941-1945 намояндагони Дастгоҳи иҷроияи Президенти Тоҷикистон, Мақомоти иҷроияи ҳокимияти давлатии вилояти Суғд ва шаҳри Гулистон иштирокчии ҷанг Воҳид Самадови 94-соларо аёдат намуданд.
Бино ба иттилои хадамоти матбуоти раиси вилояти Суғд, Раҳматулло Файззода, намояндаи Дастгоҳи иҷроияи Президент собиқадори ҷангу меҳнатро аз номи Сарвари давлат табрик намуда, ба собиқадор ҳадяпулии Пешвои миллатро дар ҳаҷми чор ҳазор сомонӣ тақдим кард.
Гуфта мешавад, намояндаи Мақомоти иҷроияи ҳокимияти давлатии вилояти Суғд Саидамин Исомиддинзода собиқадорро аз номи Раиси вилояти Суғд Раҷаббой Аҳмадзода шодбош намуда, туҳфапулии Раиси вилоятро дар ҳаҷми якуним ҳазор сомонӣ ва раиси шаҳри Гулистон Матлубахон Амонзода ҳадяпулии мақомоти иҷроияи ҳокимияти давлатии шаҳрро дар ҳаҷми як ҳазор сомонӣ супориданд.
Зимнан зикр мегардад, ки Воҳид Самадов 21-уми январи соли 1924 дар деҳаи Хистеварз тавлид ёфтааст. Моҳи октябри соли 1942 ба фронт даъват мешавад, то захм бардоштан дар хатти ҷангии Харков бо душман дар муҳорибаҳои шадид иштирок дошт.
