Дар муқоиса бо семоҳаи аввали соли 2017 тӯли се моҳи соли равон ҳаҷми интиқоли пул аз Русия ба Тоҷикистон 15,1 фоиз афзуд.
Интиқоли фаромарзии маблағҳои шахсони воқеӣ аз Русия ба Тоҷикистон дар ин давра 487 млн. долларро ташкил доданд, хабар медиҳад Бонки марказии Русия.
Байни кишварҳои ИДМ аз рӯи ин нишондиҳанда Тоҷикистон баъди Ӯзбекистон зинаи дуюмро ишғол мекунад: дар ин давра аз Русия ба Ӯзбекистон – 726 млн., Қирғизистон – 435 млн., Арманистон – 209 млн., Озарбойҷон – 191 млн., Украина – 158 млн, Қазоқистон – 143 млн., Молдова – 109 млн., Беларус – 73 млн. ва Туркманистон – 0,2 млн. доллар маблағ интиқол дода шудааст.
Ёдрас мекунем, ки семоҳаи аввали соли 2017 шахсони воқеӣ аз Русия ба Тоҷикистон 423 млн. доллар маблағ фиристода буданд.
Аз рӯи натиҷаҳои соли 2017 ҳаҷми интиқоли пул аз Русия ба Тоҷикистон 2 млрд. 536 млн. долларро ташкил дода буд, ки дар муқоиса бо соли 2016 – 607 млн. доллар зиёдтар буд.
Тибқи маълумоти гуногун, имрӯз беш аз 1 млн. нафар шаҳрвандони Тоҷикистон дар қаламрави Русия кору зиндагӣ доранд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
