Мағозаҳои фурӯши китоб, ки дар ошёнаи якуми бинои баландошёна дар хиёбони Исмоили Сомонӣ воқеъ буданд, дар ниҳояти кор макони нав дарёфтанд: акнун онҳо дар собиқ тарабхонаи “Сарез” ба китобфурӯшӣ машғул хоҳанд шуд.
“Дӯстдорони китоб ва харидорони доимӣ акнун моро дар ошёнаи якуми собиқ бинои тарабхонаи “Сарез” пайдо карда метавонанд. Айни замон ин ҷо таъмир ба итмом расида, анҷоми корҳои начандон назаррас боқӣ монд”, – хабар дод ба “Азия-Плюс” яке аз фурӯшандагони китобҳо бо номи Фирдавс.
“Ҷойи нав хуб аст, лекин бо пештара баробар шуда наметавонад. Дар маркази шаҳр харидорон зиёдтар буданд. Ҳеч гап не, акнун ба ҷойи нав одат мекунем”, – мегӯяд Фирдавс.
Ёдрас мекунем, ки ошёнаи якуми бинои баландошёнаро, ки дар он мағозаҳои китобфурӯшӣ ба таври иҷора ба савдо машғул буданд, соҳибкори инфиродӣ Тоҷиддин Шарипов қариб ба маблағи 30 млн. сомонӣ харид.
Тибқи баъзе маълумот, ӯ ҳам ин биноро ба иҷора медиҳад. Ояндаи наздик дар ин ҷо ифтитоҳи қаҳвахонаи туркӣ дар назар аст.
“Ба мо ҳам иҷораро бо нархи 10 доллар (қариб 100 сомонӣ) пешниҳод карданд, ки бароямон хеле гарон аст, зеро пештар мо 47,24 сомонӣ барои иҷора пардохт мекардем”, – изҳор дошт Фирдавс.
Бино ба гуфтаи иҷорагирон, бинои нави фурӯшгоҳи китобҳоро худи онҳо мустақилона дарёфтаанд.
Қобили зикр аст, ки дар буриши кӯчаҳои Айнӣ ва Лоҳутии шаҳри Душанбе низ бинои фурӯшгоҳи китобҳо ояндаи наздик кӯчонида ва ба ҷойи он бинои нави баландошёна сохта мешавад..
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
