Файзулло Гадоев, собиқ сардори Раёсати мубориза зидди гардиши ғайриқонунии маводи мухаддири ВКД Тоҷикистон барои даст доштан дар муомилоти ғайриқонқнии маводи нашъаовар ба 28 соли зиндони низомаш шадид маҳкум шуд.
Бино ба маълумоти маркази матбуоти ВКД Тоҷикистон, Коллегияи судӣ оид ба парвандаҳои ҷиноятии Суди Олии Тоҷикистон рӯзи 15 октябр ин ҳалномаро нисбати Файзулло Гадоев содир намудааст.
Гуфта мешавад, собиқ сардори Раёсат дар содир намудани ҷиноятҳо бо аломатҳои моддаҳои 200 қисми 4 бандҳои «в, д», 262 қисми 3 банди «б», 314 қисми 3, 316 қисми 3 банди «в» ва 319 қисми 4 бандҳои «в, г» гунаҳкор дониста шуд.
Ҳамчунин мутобиқи моддаи 51 Кодекси ҷиноятии Тоҷикистон Файзулло Гадоев аз рутбаи «Генерал-майори милитсия» ва «Ифтихорномаи Ҷумҳурии Тоҷикистон» маҳрум карда шуд.
Ғайр аз ин, бо Фармоиши Вазорати корҳои дохилии Тоҷикистон ҳамаи медалу нишонҳои сарисинагии Файзулло Гадоев, ки пеш ба ӯ тақдим гардида буд, бекор карда шуданд.
Файзулло Гадоев аз соли 1982 дар мақомоти корҳои дохилӣ ба кор шурӯъ намуд. Соли 1995 дар Раёсати мубориза бо гардиши ғайриқонунии маводи нашъаовари ВКД ҶТ кор карда, моҳи сентябри соли 2002 роҳбари ин Раёсат таъин мешавад. Моҳи ноябри соли 2007 “бо сабаби ба кори дигар гузаштан” аз ин вазифа озод карда шуд.
Дар мақомоти ҳифзи ҳуқуқ аз ҷузъиёти маҳз кай ва дар кадом ҳолат боздошт шудани Гадоев маълумот дода намешавад.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
