Соҳибкорону тоҷирони Тоҷикистон ба гирифтани қарзҳои имтиёзнок аз Ӯзбекистон ҷиҳати интиқоли молу маҳсулот аз ин кишвари ҳамсоя начандон таваҷҷуҳ доранд.
Қарзҳои содиротӣ аз Ӯзбекистон дар доираи созишномаи моҳи марти соли гузашта баизорасида байни ҳукуматҳои Тоҷикистону Ӯзбекистон дар бораи ҳамкории молиявӣ пешниҳод мешаванд.
Дар созишномаи мазкур ифтитоҳи хатҳои махсуси қарзӣ ба маблағи умумии 100 млн. доллар аз ҷониби бонкҳои муайяни кишварҳо пешбинӣ шудааст.
Пешниҳоди наздики нисфи ин қарзро аз ҷониби Тоҷикистон “Амонатбонк” анҷом медиҳад. “Амонатбонк” бо ду бонки Ӯзбекистон ҷиҳати пешниҳоди ин қарзҳо ба маблағи умуии 43 млн. доллар қарордод ба имзо расонид.
Раиси “Амонатбонк” Сироҷиддин Икромӣ рӯзи 5 феврал ба “Азия-Плюс” дар ин робита иттилоъ дод, ки то имрӯз бонк ҳамагӣ дар ҳаҷми 507 ҳазор сомонӣ ё худ 1,2% аз ҳаҷми умумӣ аз ин маблағҳо қарз додааст.
Омили асосии худдорӣ варзидани соҳибкоронро аз гирифтани ин қарз Икромӣ ба додани он бо асъори амрикоӣ нисбат медиҳад.
“Тайи солҳои охир тамоили беуқрбшавии арзи миллӣ нисбати асъори хориҷӣ ҷараён дошта, аз ин рӯ, шаҳрвандони мо гирифтани қарзҳоро бо сомонӣ афзалтар медонанд, зеро дар сурати бо асъори хориҷӣ гирифтани қарз, ба мушкилӣ дучор шуда метавонанд”, – иброз дошт Икромӣ.
Ғайр аз ин, камтаваҷҷуҳии тоҷирону соҳибкорони тоҷикро ба гирифтани ин қарз Икромӣ ба шартҳои ҷониби Ӯзбекистон низ марбут медонад, ки воситаҳои пулӣ дода нашуда, танҳо молу маҳсулот пешниҳод мегардад.
“Дар ин самт тадбирҳо роҳандозӣ шуда, умедворем, ки дар ҳамдастӣ бо шарикони ӯзбек ба тағйиротҳои муайян дар ин масъала ноил мегардем, ки ба афзудани таваҷуҳи соҳибкорон ба дастрасӣ ба ин қарзҳо мусоидат менамояд”, – илова намуд ӯ.
“Амонатбонк” дар баробари “Ориёнбонк” ва “Бонки Эсхата” ба сифати миёнарав дар ҷараёни пешниҳоди қарзҳо аз ҷониби Тоҷикистон иштирок мекунад, яъне ширкатҳои Тоҷикистонро маблағгузорӣ мекунад, ки ба ин васила онҳо аз Ӯзбекистон молу маҳсулот харида метавонанд.
Ширкатҳои воридкунандаи молу маҳсулот ба Тоҷикистон, ки ба интиқоли маҳсулоти Ӯзбекистон хоҳиш доранд, метавонанд то 1 млн. доллар қарз гиранд.
Қобили зикр аст, ки қарзҳои Ӯзбекистон ба муҳлати аз 1 то 3 сол дода мешаванд, яъне барои молу маҳсулоти ниёзи мардум – ба муддати 1 сол ва барои таҷҳизот – то 3 сол. Агар муҳлати қарз 1 сол бошад, меъёри фоиз ба он 8%-и солона ва беш аз 1 сол – 9%-и солонаро ташкил медиҳад.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
