Дар робита ба баргузор намудани корҳои таъмиру навсозӣ тибқи нақшаи пешбинишуда, имрӯз, 5 март аз соати 09:00 то 16:00 интиқоли нерӯи барқ ба қисмати зиёди кӯчаву маҳаллаҳои шаҳри шаҳри Душанбе қатъ мегардад.
Тавре ба “Азия-Плюс” аз шабакаҳои барқи пойтахт хабар доданд, дар фосилаи вақти зикршуда интиқоли нерӯи барқ ба кӯчаву маҳаллҳои Зебуннисо, Чиноро, Назаршоев, С. Айнӣ, Ҷ. Расулов, Маяковский, Якачинор, А. Ғуломов, А. Сино, С. Шерозӣ, 9 январ, Роҳи нав, микрорайонҳои: Қаротегин, Камол, Чинори Эмом, 31, 32, 33 боздошта мешавад.
“Вобаста ба ҳаҷми корҳои таъмирӣ, ба баъзе кӯчаву маҳаллаҳо барқ пеш аз вақти нишондодашуда метавонад интиқол дода шавад”, – қайд карданд дар идораи Шабакаҳои барқи Душанбе.
Қобили зикр аст, ки давоми моҳҳои январ ва феврал қариб ҳамарӯза бонавбат интиқоли барқ ба кӯчаву маҳаллаҳои гуногуни шаҳр қатъ мешавад, зеро кормандони шабакаҳои барқи пойтахт тибқи нақша корҳои таъмиру навсозӣ мегузаронанд.
Сарфа мекунанд, лекин мегӯянд, ки таъмиру навсозӣ аст
Дар ширкати “Барқи тоҷик” ин қатъкуниҳои муваққатии интиқоли барқро ба баргузории корҳои таъмиру навсозӣ дар хатҳои интиқоли барқ ва зеристгоҳҳо пас аз сарбории зербино дар мавсими зимистон нисбат медиҳанд.
Дар шабакаҳои барқ бошад, таваққуфҳо дар интиқоли барқро ба норасоии об дар обанбори Норак марбут медонанд.
“Дар обанбор начандон оби зиёд боқӣ мондааст, аз ин рӯ маҷбурем, ки сарфакорӣ намоем”, – гуфтанд дар яке аз воҳидҳои ширкати “Барқи тоҷик”.
Аввали моҳи марти соли равон сатҳи об дар обанбори Норак дар нишондиҳандаи 865 метр қарор дошт. То ба истилоҳ ба “ҳадди ақал” (857 метр аз сатҳи баҳр), ки бо расидан ба он истифодабарии обанбор аз рӯи нишондиҳандаҳои техникӣ манъ мешавад, ҳанӯз аввали ҳамин моҳ 8 метр боқӣ монда буд. Ҳамин давраи соли гузашта сатҳи оби иҷозашудаи обанбор барои истифода беш аз 16 метрро ташкил медод.
Ба камбуди барқ ҳамчунин боздошта шудани кори агрегати якуми нерӯгоҳи барқи обии Роғун, ки моҳи ноябри соли гузашта мавриди баҳрабардорӣ қарор гирифта буд, низ таъсир расонид.
Дар мақомоти энергетика мегӯянд, ин тасмим бо мақсади баргузор намудани корҳо ҷиҳати ошкор кардани ноқисии қисмҳои гидроагрегат рӯйи кор омадааст.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
