Раиси шаҳри Душанбе Рустами Эмомалӣ ба тарабхонаҳои шаҳр дастур дод, ки сарфи назар аз моҳи шарифи Рамазон, ба меҳмонон хизматгузории мукаммалу мунтазамро ба роҳ монанд.
Бино ба иттилои дафтари матбуоти мақомоти шаҳрдорӣ, ин дастур бо назардошти зиёд гардидани ташрифи меҳмонон ва сайёҳон ба шаҳри Душанбе содир шудааст.
“Оғози фаъолияти тарабхонаҳои шаҳрро дар моҳи шариф Рамазон аз соати 11:00 ба роҳ монда, ҷиҳати ба таври пурраву мунтазам хизматрасонӣ намудани онҳо мусоидат карда шавад”, – омадааст дар дастур.
Зимнан зикр мегардад, ки дар ҳолати иҷро нагардидани талаботи мазкур, нисбати соҳибмулкони тарабхонаҳо тадбирҳои дахлдор андешида мешаванд.
Имсол моҳи шарифи Рамазон дар Тоҷикистон санаи 6 май фаро расид. Дар ин робита аксари қаҳвахонаву тарабхона ва чойхонаҳо рӯзона кор намекунанд. Моликони онҳо мегӯянд, кори рӯзона дар моҳи Рамазон фоида намеорад, зеро аксарият рӯза дошта, шумори мизоҷон хеле кам аст.
Бино ба маълумоти Кумитаи рушди сайёҳии ҷумҳурӣ, семоҳаи аввали соли равон беш аз 215 ҳазор нафар шаҳрвандони хориҷӣ бо мақсади сайру саёҳат аз Тоҷикистон боздид кардаанд.
Раиси Кумитаи рушди сайёҳӣ Нуъмон Абдуғаффорзода чанде қабл ба вакилони палатаи поёнии парлумон хабар дод, ки мавсими сайёҳӣ дар Тоҷикистон моҳи май оғоз гардида, минбаъд шумори сайёҳони хориҷӣ тадриҷан меафзояд.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
