Имрӯз 9 моҳ мешавад, ки аз Икром Ҳамидови 9-сола дараке нест. Ӯ 27-уми августи соли 2018 аз назди ҳавлии бинои истиқоматиашон (ноҳияи Фирдавсӣ, кӯчаи Борбад 64\ 2 ҳуҷраи 28) бедарак шудааст. Модари Икром дар суҳбат ба “Азия-Плюс” гуфт, ки то имрӯз аз фарзандаш хабаре нест. Ба гуфтаи ӯ то ҳол тафтишот аз ҷониби мақомотҳои дахлдор идома дорад ва худи онҳо низ аз пайи ҷустуҷӯ ҳастанд.
Зулфия Ҳамидова, модари Икром дар бедарак шудани фарзандаш ҳамсояи худ Зокир Ҷабиловро гунаҳгор медонад. Ӯ гуфт:
– 9 моҳ мешавад интизори писарам ҳастам. Аммо аз ӯ хабаре нест. Ман аз шавҳарам ҷудо шуда, писару духтарамро худам дар танҳоӣ тарбият мекунам. Бо Зокир Ҷабилов, ки ҳамсоя будем, то як сол аз ман хоҳиш мекард, ки ҳамсари ӯ шавам. Аммо ман ҷавоби ӯро рад карда, суханонашро гӯш накардам. Бовар дорам, ки барои маро тарсондан ё розӣ кардан ба ин кор даст зад. Ман аз болои ӯ ба милитсия ариза навиштам. Баъди аризаи навиштаам милисаҳо ӯро боздошт карданд ва ҳамаи ҳуҷҷатҳо, аз ҷумла шиноснома, билети ҳарбӣ дигар ҳуҷҷатҳояшро гирифта буданд ва ӯро баъди пурсиш ҷавоб доданд. Рӯзи 29-ум баъди тафтиши камераҳо маълум гардид, ки ҳамин одам писарамро бо худ мебарад ва баъд ӯ якбора ғайб зад. Ва то имрӯз на аз худаш ва на аз писарам дараке нест. Мақомоти дахлдор то ҳол тафтишот бурда истодаанд ва хабар доданд, ки Зокир Ҷабилов аз Тоҷикистон берун нашудааст ва дар дохили кишвар аст.
Ба гуфтаи Зулфия, барои пайдо кардани писараш ба назди хонаводаи Зокир Ҷабилов ба мавзеи колхози Россия низ рафтааст, ки шояд ягон маълумоте пайдо кунанд, аммо ноумед баргаштанд. Чун Ҷабилов бо ягон узви хонаводааш алоқа надоштааст. Танҳо бо як хоҳараш каму беш дар тамос мешудаасту халос.
– Ба хонаи апаи хурдии Зокир рафтем, то барои пайдо кардани писарам кӯмак кунад. Аммо ӯ худро ба рӯи замин партофта гиря мекард, ки ӯ аз ин ҳодиса хабар надорад. Худро бемор гуфта аз ҳуш меравонд. То ҳол намефаҳмам онҳо чӣ гуна оилаанд, – илова кард Зулфия.
То имрӯз тафтишоти бедарак шудани Икром Ҳамидов идома дорад. Модари Икром аз ҳамаи сокинон имдод мекунад, ки дар пайдо кардани фарзандаш ба ӯ ёрӣ расонанд.
Умарҷони Эмомалӣ, сардори дафтари матбуоти Вазорати корҳои дохилӣ иброз дошт, ки корҳои ҷустуҷӯи Икром Ҳамидҷонов идома дошта, то ҳол аз ӯ хабаре нест. Мавсуф илова мекунад, ки барои пайдо намудани ин ноболиғ ҳамаи чораҳои ҷустуҷӯи оперативӣ идома дошта, дар телевизион низ акси ӯ зуд-зуд ба намоиш гузошта мешавад, то мардум дар пайдо гардидани ӯ бо кормандони милитсия ҳамкорӣ дошта бошанд.
Мисли Икром кам нестанд наврасону ноболиғоне, ки беному нишон гардида, то имрӯз аз онҳо хабаре нест. Яке аз онҳо ҳодисаи ваҳмангезе, ки соли 2013 ҳамаро ба ҳайрату ваҳм афканд, аз наздикии маркази тиҷоратии “Садбарг” бедарак шудани Малика ва Сабина Араловаҳост, ки фарзандони ду бародар буданд ва то имрӯз аз онҳо маълумоте нест.
Тибқи иттилои ВКД дар чор моҳи соли равон дар кишвар 119 кӯдак бедарак гардида, ки дар муддати кӯтоҳ ҳамаи онҳо дарёфт ва ба волидону наздиконашон супорида шудаанд.
Соҳибназарон дар гум шудани кӯдакон аслан калонсолонро гунаҳгор меҳисобанд ва андеша доранд, ки аз беаҳамиятии онҳо кӯдакон роҳи хонаи худро гум мекунанд ва баъдан аз дигар хиёбонҳо пайдо мешаванд ё тамоман бенишон мегарданд.
