Дар Тоҷикистон "Нақшаи чорабиниҳо оид ба солимгардонии вазъи молиявии ШСХК "Барқи Тоҷик" барои давраи солҳои 2017-2022" таҳия гардидааст, ки барои амалисозии он 1,2 млрд. доллар маблағ зарур аст, гуфта мешавад дар ҳисоботи вазири энергетика ва захираҳои оби ҷумҳурӣ Усмоналӣ Усмонзода ба ҳукумати ҷумҳурӣ, ки дар ихтиёри “Азия-Плюс” қарор дорад.
Қайд мешавад, ки ин маблағ барои анҷоми пардохтҳои ҷорӣ, қарзҳои кредиторӣ назди барқистеҳсолкунандагони мустақил (Сангтӯда-1 ва Сангтӯда-2), пардохти қарзҳои тиҷоратии бонки маҳаллӣ (“Ориёнбонк”), инфрасохтори зарурӣ барои ҳисобкунӣ, барқарорсозӣ ва таҷдиди иншооти интиқол ва тақсимоти нерӯи барқ ва ғайра истифода мешавад.
Сарчашмаҳои воситаҳои зхарурӣ барои амалсиозии ин тадбирҳо захираҳои иловагии молиявии ширкати "Барқи Тоҷик" номида мешаванд, ки дар натиҷаи афзоиши воридоти пулӣ ва кам кардани хароҷот дар натиҷаи андешидани чораҳои зарурӣ ташаккул меёбанд.
Ҳамчунин ҷалби воситаҳои ниҳодҳои молии байнулмилалӣ, аз ҷумла Бонки ҷаҳонӣ, Бонки осиёгии рушд ва дигар шарикони рушд ба нақша гирифта шудааст.
Гуфта мешавад, ҷиҳати амалӣ намудани чорабиниҳои нақшаи мазкур соли равон ҷалби қарзҳои Бонки ҷаҳонӣ ба миқдори 130 миллион доллар барои пардохт намудани қарзҳои кредиторӣ назди бонки тиҷоратии маҳаллӣ (”Ориёнбонк”) ва барқистеҳсолкунандагони мустақил (Сангтӯда-1 ва Сангтӯда-2) пешбинӣ шудааст.
Дар ҳисоботи вазир таъкид мешавад, ки барои амалисозии нақшаи мазкур дар мавриди ҷалби гранти Бонки ҷаҳонӣ низ гуфтушунидҳо ҷараён доранд.
Қарзҳои “Барқи тоҷик”
Ҳаҷми умумии қарзҳои ширкати “Барқи тоҷик” ба ҳолати аввали соли ҷорӣ ба 22,9 млрд. сомонӣ (беш аз 2,4 млрд. доллар) расид.
Қарзҳои ширкати энергохолдингӣ бидуни назардошти созишномаҳои сармоягузорӣ 4,4 млрд. сомониро ташкил медиҳанд.
Аз ҷумла, “Барқи тоҷик” назди нерӯгоҳҳои Сангтӯда беш аз 1 млрд. сомонӣ ва аз пардохти андоз – 66 млн. сомонӣ қарздор аст. Ҳамчунин ширкат аз ҶСК “Ориёнбонк” қарзҳои зиёд дошта, маблағҳои қарзӣ ҳамчунин аз ҳисоби харидории ангишт ва дигар навъи сӯзишворӣ (мазут ва ғайра) низ ба вуҷуд омадаанд.
Ҳаҷми қарз назди Вазорати молия аз рӯи созишномаҳои қарзии сармоягузорӣ ба аввали соли равон 18,5 млрд. сомониро ташкил медиҳад.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
