Ду маъмури милитсия – Зубайдулло Сангинмуродзода ва Сафар Додаров, ки ба шиканҷаи сокини Душанбе Умед Ҳикоятов муттаҳам буданд, ба ҷойи кори худ баргаштаанд.
Як манбаъ дар мақомоти умури дохилии Тоҷикистон рӯзи 27-уми август ба Радиои Озодӣ тасдиқ кардааст, ки, Сангинмуродзода ба сифати сардори "минтақаи маъмурии милитсияи №13"-и ноҳияи Фирдавсӣ аст ва Сафар Додаров ҳамроҳи ӯ дар ҳамин сохтор фаъолият доранд.
Гулчеҳра Холматова, вакили мудофеи Умед Ҳикоятов гуфтааст, Додситонии Душанбе бо далели наёфтани ҷиноят парвандаи зидди милисаҳоро қатъ кардааст. Холматова гуфт, ба мақомоти додситонӣ далелҳои зиёд пешниҳод карда буд, вале онҳоро ба инобат нагирифтаанд.
"Ба Додситонии кулли Тоҷикистон шикоят мекунем. Агар дар он ҷо ба ин масъала расидагӣ нашавад, ба додгоҳ шикоят мебарем, ки қарори додситонии шаҳрро бекор кунад", – илова кардааст ӯ.
Гуфта мешавад, нисбат ба Зубайдулло Сангинмуродзода ва Сафар Додаров бар асоси қисми сеюми моддаи 316-и Кодекси ҷиноӣ – "баромадан аз ҳадди ваколати мансабӣ" парванда боз шуда буд.
Умед Ҳикоятовро рӯзи 31-уми марти имсол бо нишонаҳои "осеби пӯшидаи моядон" ва "кафидани мояҳои чапу рост" ба бемористон бурда буданд. Ӯ даъво дорад, ки ду нозири минтақавии милиса шиканҷааш карда, "ҳаёташро сӯзонданд".
Намояндагони Шӯъбаи корҳои дохилии Фирдавсӣ гуфта буданд, ки Умед Ҳикоятов бо иттиҳоми "вайрон кардани тартиботи ҷамъиятӣ дар ҳолати мастӣ" боздошт шуд, аммо "латту кӯб нашудааст".
