ҶСП “Фароз” дар сомонаи расмии худ дар доираи барҳамдиҳии ширкат рӯйхати иншооти ба фурӯш гузоштаашро нашр кард.
Мувофиқи рӯйхат, “Фароз” 4 анбори нигаҳдории сӯзишворӣ ва гази моеъ, 19 нуқтаи фурӯши сӯзишворӣ дар шаҳри Душанбе ва вилояти Хатлон, 8 пойгоҳи автомобилӣ ва 1 мактаби тайёркунии ронандагонро мефурӯшад.
Ҳамчунин “Фароз” 9 маркази муоинаи техникии автомобилӣ ва таъмири мошинҳо, 3 корхонаи истеҳсоли бетон, шағал ва хиштро низ ба фурӯш гузоштааст.
Дар рӯйхати иншоот ҳамчунин бинои маъмурӣ дар Душанбе, 4 автогараж дар ҷумҳурӣ ва наздики 60 адад автомашинаҳои сабукрав ва боркаш дарҷ ёфтааст.
Охири ҳафтаи гузашта маълум шуд, ки ҶСП “Фароз” – яке аз ширкатҳои бузургтарини Тоҷикистон дар бораи ихтиёран барҳамдиҳиаш ба Кумитаи андоз хабар дод. Чанде қабл ширкат дар изҳороти худ оид ба тоб наовардани рақобат дар бозори фурӯши сӯзишворӣ, фурӯши амвол, рухсатии кормандон, иҷрои уҳдадориҳо хабар дод.
“Ҷамъият барои бунёд ва навсозии як қатор иншооти дорои аҳамияти иҷтимоӣ саҳм гузошт. Бинобар сабаби зиёд гардидани хароҷоти таъминот, нигаҳдошт, хизматрасонӣ ва таъмини фаъолияти минбаъдаи онҳо, ки маблағгузории доимӣ ва зиёдро талаб мекунад, ба Ҷамъият зарари молӣ расонида шуда, имконияти таъмини минбаъдаи онҳоро мушкил гардонидааст”, – гуфта мешавад дар изҳорот.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
