Сокинони маҳаллӣ субҳи 9-уми ноябр ба сохторҳои қудратии Тоҷикистон дар бораи мушоҳидаи шахсони шубҳаноки мусаллаҳи сиёҳпӯш дар дараи Ширкенти шаҳри Турсунзода хабар доданд. Ва оғоз шуд…
Сохторҳои қудратии Тоҷикистон дар вокуниш ба маълумоти расида фавран ба Турсунзода нерӯ ва воситаҳои иловагӣ, аз ҷумла, чархболҳо ва техникаи зиреҳпӯшро сафарбар карданд. Дар ин бора ба “Азия-Плюс” як манбаъ аз бахши қудратии ҳукумати Тоҷикистон иттилоъ дод.
“Пас аз расидани ин маълумот дар роҳи мошингарди Душанбе – Турсунзода постгоҳҳои кормандони сохторҳои қудратӣ гузошта шуда, чархболҳо мавзеи кӯҳистонро таҳти назорат гирифтанд. Дар натиҷа маълум шуд, он шахсоне, ки маълумотро дар бораи “одамони сиёҳпӯши шубҳаноки мусаллаҳ” ба Душанбе расониданд, шикорчиёни маҳаллиро тахрибкорони эҳтимолӣ пиндоштаанд”, – гуфт манбаи “Азия-Плюс”.
Ба гуфтаи ӯ, дар бораи баргузории тадбирҳои фаврӣ дар минтақаи наздисарҳадӣ саривақт ҷониби Ӯзбекистон огоҳонида шуд.
“Баъд аз чанде ҳамаи постгоҳҳои иловагӣ дар роҳи Турсунзода – Душанбе баргирифта шуда, нерӯ ва воситаҳои иловагии сохторҳои қудратӣ ба қароргоҳи доимиашон баргаштанд”, – хабар дод манбаъ.
Таъкид шуд, ки дидбонгоҳи назоратии “Дӯстӣ”-и шаҳри Турсунзода дар сарҳади байни Тоҷикистону Ӯзбекистон ҳангоми баргузории тадбирҳои махсус баста нашуда, айни замон ҳамаи 17 гузаргоҳ дар марзи кишварҳо бо реҷаи муқаррарӣ фаъолият доранд.
Шаби 6-уми ноябр ба дидбонгоҳи сарҳадии №4 “Ишқобод”-и дастаи сарҳадии “Султонобод дар наздикии марзи Тоҷикистону Ӯзбекистон, 60 километр дуртар аз Душанбе ҳамлаи мусаллаҳона сурат пазируфт.
Дар ҷараёни амалиёти махсуси сохторҳои қудратии Тоҷикистон 15 нафар ҳамлаварон кушта ва 5 тан аз онҳо боздошт шуданд.
Ҳамчунин дар ҷараёни амалиёти махсус 6 хизматчии ҳарбӣ, аз ҷумла, 1 корманди милитсия ва 5 марзбон ба ҳалокат расиданд. Масъулияти ин ҳамларо гурӯҳи террористии ба ном “Давлати исломӣ” (фаъолияташ дар Тоҷикистон мамнӯъ) ба уҳда гирифт.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
