Дар шимоли Тоҷикистон фаъолияти “пирамидаи молиявӣ” ошкор гардид, ки онҳо ба фурӯши аксияҳои қалбакии ширкатҳои бонуфузи ҷаҳонӣ ба монанди “Ford”, “Walt Disney”, “Starbuck’s”, “Netflix” машғул будаанд.
Кормандони шуъбаи минтақавии мубориза бар зидди ҷиноятҳои муташаккили ВКД дар вилояти Суғд намояндагони қалбакии ширкати хориҷии “Unique Finance” ошкор кардаанд. Марбут ба ин қазия маркази матбуоти РВКД-и Суғд дар барномаи телевизионии “Милитсия хабар медиҳад” иттилоъ додааст.
Ин гурӯҳ худро ба мардум намояндаи ширкати хориҷии “Unique Finance” муаррифӣ карда, ба фурӯши саҳмияҳои қалбакӣ, ки гӯё шахси саҳмиядор аз болоравии нархи он даромади пулӣ ба даст меорад, машғул будааст. Онҳо маблағҳои калони шаҳрвандонро ба даст оварда, ба эҳтиёҷоти шахсии худ сарф кардаанд.
Яке аз созмондиҳандагони “пирамидаи қалбакӣ” Нурулло Ҳусейнов, истиқоматкунандаи шаҳри Душанбе ва роҳбари ҶДММ “Нур Сафар” мебошад. Ба ғайр аз ӯ нисбат ба 7 нафари дигар низ парвандаи ҷиноятӣ оғоз карда шудааст.
Онҳо барои иҷрои нақшаи ҷиноятӣ дар шаҳрҳои Душанбе ва Хуҷанд идораи худро таъсис дода, ба ҷалби шаҳрвандон машғул мешаванд.
Нурулло Ҳусейнов дар бозпурсӣ ба суоли муфаттиш, ки “оё шаҳрвандони зарардида метавонанд маблағҳояшонро бозпас гиранд?” чунин посух додааст: “Ин маблағҳоро на Сайфиев, на Шамшод Маҳмадов, на Нурулло Ҳусейнов ба даст гирифтагӣ нест ва намегирад! Ҷавобгарӣ низ ба гардани мо нест!”
Нафарони касбу кори гуногун, аз ҷумла, соҳибкорон пасандозҳои худро ба онҳо бовар карда, саҳмияҳои қалбакиро гирифтаанд.
Яке аз шаҳрвандони фиребхӯрда – Ботур Ниёзов, сокини ноҳияи Бобоҷон Ғафуров мегӯяд: “Ба суханони онҳо бовар карда, “регистратсия” шудам. Баъдан моҳи июни соли 2019 дар конфронси ҷумҳуриявӣ, ки дар кохи “Суғдиён”-и шаҳри Хуҷанд баргузор гардид, Нурулло Ҳусейнов худро ҳамчун роҳбари ширкати “Нур Сафар” муаррифӣ карда, иброз дошт, ки ширкати “Unique Finance” қонунӣ карда шуда, он зертобеи ширкати “Нур Сафар” мебошад. Ман ба онҳо бовар карда, бо маблағи 15 ҳазор доллар саҳмия харидам”.
Шаҳрванди дигар – Дилором Мунавварова, сокини шаҳри Хуҷанд мегӯяд: “Баъд аз он ки офиси худро дар кохи “Матбуот” кушоданд, ҳама аксҳои бренди компанияро овехтанд. Моро даъват карданд, то омада бубинем, ки ҳама чӣ қонунӣ карда шудааст. Дар ҳақиқат мо омада дидем, ки ҳама чӣ ҳаст, мо ба онҳо бовар кардем. Пас аз ин ман боз 1000 доллари дигар гузоштам, то аз он низ фоида гирам”.
Айни ҳол аз рӯйи ин ҳодиса бо ду моддаи Кодекси ҷиноятии ҶТ – 247 (Қаллобӣ) ва 276 (Дидаю дониста додани рекламаи бардурўғ) парванда кушода шудааст.
Тафтишот 15 нафарро ҷабрдида эътироф кардааст, ки ҳоло ин шумораи ниҳоӣ нест. Ин нафарон бо маблағи аз 1000 то 45000 доллари ИМА саҳмия харидаанд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
